বিলাসীপাৰা, 22 আগষ্ট:বিলাসীপাৰাৰ ফুটকিবাৰীত শনিবাৰে সংঘটিত হয় এক শোকাৱহ ঘটনা ৷ আৰ্থিকভাৱে জুৰুলা হৈ পৰা এহাল দম্পতীয়ে বাছি লয় আত্মহত্যাৰ পথ ৷ পেছাত এগৰাকী টেম্পো চালক আছিল বিষ্ণু নাথ ওৰফে কনক নামৰ লোকগৰাকী ৷ কিন্তু লক ডাউনৰ বাবে নিয়মিতভাৱে তেওঁ টেম্পো চলাব নোৱাৰাৰ ফলত সন্মুখীন হৈছিল আৰ্থিক অনাটনৰ ৷
পৰিয়ালৰ লোকে জানিবলৈ দিয়া অনুসৰি, লোকগৰাকীয়ে বন্ধন বেংকৰ পৰা ঋণ লৈ ক্ৰয় কৰিছিল টেম্পোখন ৷ কিন্তু লক ডাউনৰ বাবে তেওঁ টেম্পোখন চলাব পৰা নাছিল ৷ যাৰ বাবে তেওঁ পৰিশোধ কৰিব পৰা নাছিল টেম্পোখনৰ ঋণ ৷ সেয়েহে আৰ্থিক দীনতাৰ বাবে লোকগৰাকীয়ে নিজৰ পত্নীসহ গাত কেৰাচিন ঢালি অগ্নি সংযোগ কৰি আত্মহত্যা কৰে ৷ শৰীৰৰ অধিকাংশই অগ্নিদগ্ধ হোৱা দম্পতীহালক পৰৱৰ্তী সময়ত গুৱাহাটী চিকিৎসা মহাবিদ্যালয়ৰ চিকিৎসালয়ত লৈ যায় যদিও, চিকিৎসাধীন অৱস্থাতে মৃত্যুক সাৱটি লয় দম্পতীহালে ৷ দম্পতীহালে এটি তিনি বছৰীয়া পুত্ৰ সন্তানক এৰি থৈ যায় বুলি জানিবলৈ দিয়ে পৰিয়ালৰ লোকে ৷