ধেমাজিত একে নিশাই সংঘটিত দুটা পৃথক পথ দুৰ্ঘটনা দুজন লোকৰ মৃত্যু

ধেমাজি জিলাৰ পানীতোলা আৰু চিৰিপাণিত পৃথক পৃথক পথ দুৰ্ঘটনাত দুজন লোকৰ মৃত্যু ৷ পানীতেলাত স্থানীয় ৰাইজে কেইবাঘণ্টা ধৰি অৱৰোধ কৰি ৰাখিলে ৰাষ্ট্ৰীয় ঘাইপথ ৷

ধেমাজি , 24 নৱেম্বৰঃ ধেমাজি জিলাত ৰবিবাৰে নিশা সংঘটিত দুটা ভয়ংকৰ পথ দুৰ্ঘটনাত মৃত্যু হয় দুজনকৈ লোকৰ ৷ ধেমাজি আৰক্ষী থানাৰ অন্তৰ্গত ১৫ নং ৰাষ্ট্ৰীয় ঘাইপথৰ পানীতোলাত ৰবিবাৰে নিশা এগৰাকী চাইকেল আৰোহীক মহটিয়াই নিলে এখন ট্ৰাকে ৷ দুৰ্ঘটনাটোত থিতাতে নিহত হয় গাহৰি পাম গাঁৱৰ মুকুতা চুতীয়া নামৰ লোকজনৰ ৷ ইয়াৰে পাছতে স্থানীয় ৰাইজে কেইবা ঘণ্টাজুৰি ৰাষ্ট্ৰীয় ঘাইপথ অৱৰোধ কৰি ৰখাৰ ফলত অঞ্চলটোত সৃষ্টি হয় এক উত্তপ্ত পৰিস্থিতিৰ ৷ পিছত ঘটনাস্থলীত উপস্থিত হৈ পৰিস্থিতি নিয়ন্ত্ৰণ কৰে আৰক্ষীয়ে ৷

আনহাতে জিলাখনৰ চিৰিপাণিত এখন উইংগাৰ আৰু বাইকৰ মুখামুখি সংঘৰ্ষৰ ফলত বাইক আৰোহী স্বপন বৈদ্য নামৰ লোকজনৰ থিতাতে মৃত্যু হয় ৷ ব্যক্তিজনে নিজৰ পঞ্জীয়ন বিহীন বাইকেৰে 15 নং ৰাষ্ট্ৰীয় ঘাইপথেৰে চিলাপথাৰৰ পৰা ধেমাজিলৈ গৈ থকা অৱস্থাতে বিপৰীত দিশৰ পৰা আহি থকা উইংগাৰৰ সৈতে মুখামুখি সংঘৰ্ষ হয় ৷ একেটা দিনতে দুটা পৃথক পৃথক পথ দুঘটনাত দুজনলোকৰ মৃত্যুক লৈ শোকৰ ছাঁ পৰিছে অঞ্চল কেইটাত ৷

লগতে পঢ়কঃ আমগুৰিত 4 টা সংগঠনৰ প্ৰতিবাদ