জোনাই,১৯ জুন: সদ্য ঘোষিত হাইস্কুল শিক্ষান্ত পৰীক্ষা আৰু উচ্চতৰ মাধ্যমিক পৰীক্ষাত সুখ্যাতিৰে উত্তীৰ্ণ হোৱা শিক্ষাৰ্থীসকলক সোমবাৰে সম্বৰ্ধনা জ্ঞাপন কৰা হয় । চিলাপথাৰৰ সমীপৰ মাজৰবাৰী ৰাসমন্দিৰ প্ৰেক্ষাগৃহত ধেমাজি জিলা বাঙালী যুব-ছাত্ৰ ফেডাৰেশ্যনে এখন সভাত সম্বৰ্ধনা জ্ঞাপন কৰে । ফেডাৰেশ্যনৰ ধেমাজি জিলাৰ শিক্ষা সম্পাদক প্ৰভাষ বিশ্বাসে আঁত ধৰা সম্বৰ্ধনা সভাখনত সৰ্বোদয় হাইস্কুলৰ প্ৰধান শিক্ষক জীৱন পেগুয়ে সভাপতিত্ব কৰে ।
এই সভাৰ উদেশ্য ব্যাখ্যা আগবঢ়ায় ফেডাৰেশ্যন ধেমাজি জিলাৰ সাধাৰণ সম্পাদক ভদ্ৰ দাসে । তাৰ পাছতেই হাইস্কুল শিক্ষান্ত পৰীক্ষা আৰু উচ্চতৰ মাধ্যমিক পৰীক্ষাত সুখ্যাতিৰে উত্তীৰ্ণ হৈ অঞ্চলটোলৈ গৌৰৱ কঢ়িয়াই অনা কৃতি ছাত্ৰ-ছাত্ৰীক উদেশ্যে বক্তাসকলে ভাষণ আগবঢ়ায় । ফেডাৰেশ্যনৰ জিলা সভাপতি ধৰ্মেন্দ্ৰ দাস, কেন্দ্ৰীয় উপ সভাপতি গোবিন্দ মণ্ডল, প্ৰধান শিক্ষক ক্ৰমে হৰিনাথ মজুমদাৰ, সূৰ্য কুমাৰ বিশ্বাস, শিক্ষক সুনীল দাস, নিৰঞ্জন বিশ্বাস আৰু সুকুমাৰ চক্ৰৱৰ্তীয়ে কৃতি শিক্ষাৰ্থী সকলক গুণগত শিক্ষা আৰু দক্ষতা বিকাশৰ ওপৰত গুৰুত্ব আৰোপ কৰি জীৱনটো আগুৱাই নিবলৈ আহ্বান জনায় । লগতে স্বকীয় জাতিসত্তা জীয়াই ৰখাৰ স্বাৰ্থত মেধাৱী শিক্ষাৰ্থী সকলে সদায় অহোপুৰুষাৰ্থ কৰি নতুন প্ৰজন্মৰ মাজত কৰ্মসংস্কৃতিৰে সমিলমিলেৰে চলাৰ আহ্বান জনায় । ছাত্র-ছাত্ৰী সকলে সুখ্যাতিৰে পৰীক্ষা সমূহত উত্তীৰ্ণ হৈ কেৱল চাকৰিমুখী হোৱাৰ মানসিকতা পৰিহাৰ কৰি জাতি, সমাজৰ উন্নয়নৰ বাবে সেৱা আগবঢ়াই যাবলৈ আহ্বান জনায় । এগৰাকী ৰুচিসম্পন্ন আৰু সংস্কৃতিৱান নাগৰিক হিচাপে নিজকে গঢ়ি তুলি পথ প্ৰদৰ্শকৰ ভূমিকা গ্ৰহণ কৰিবৰ বাবে সকলোৱে ভাষণ আগবঢ়ায় ।