জোনাই,২৬ অক্টোবৰ: ৰাজ্যত গঢ় লৈ উঠিছে ক্ৰীড়াৰ এক পৰিৱেশ । অসমৰ খেলুৱৈ জিলিকি উঠিছে অলিম্পিকৰ দৰে আন্তঃৰাষ্ট্ৰীয় প্ৰেক্ষাপটত । চুকে-কোনে যুৱক-যুৱতী আকৰ্ষিত হৈছে ক্ৰীড়াৰ প্ৰতি । ইয়াৰ মাজতে জোনাইত বুধবাৰৰ পৰা আৰম্ভ হৈছে মিচিং অলিম্পিকৰ । মিচিং সমাজৰ পৰা একোজন সুদক্ষ খেলুৱৈ সৃষ্টি কৰাৰ লক্ষ্যৰে অনুষ্ঠিত কৰা মিচিং অলিম্পিকৰ আজি দ্বিতীয়টো দিন ।
মিচিং অধ্যুষিত গ্ৰাম্য অঞ্চলৰ পৰা সুপ্ত ক্ৰীড়া প্ৰতিভা সম্পন্ন যুৱক-যুৱতীক ক্ৰীড়া ক্ষেত্ৰখনত সহায় হোৱাকৈ এই ব্যতিক্ৰমী পদক্ষেপ গ্ৰহণ কৰিছে মিচিং জাতীয় ছাত্ৰ সংগঠন TMPK য়ে । ১৬ আৰু ১৯ বছৰৰ অনুৰ্ধ্বৰ যুৱক-যুৱতীয়ে নিজৰ ক্ৰীড়া প্ৰতিভাসমূহ প্ৰদৰ্শন কৰি মিচিং অলিম্পিকৰ জৰিয়তে ৰাষ্ট্ৰীয় আন্তঃৰাষ্ট্ৰীয় ক্ৰীড়া প্ৰতিযোগিতাত অংশগ্ৰহণ কৰি জাতিটোৰ লগতে নিজৰ সুনাম কঢ়িয়াই আনিব পাৰে তাৰ উদেশ্যৰে এই কাৰ্যসূচী ৰূপায়ণ কৰিছে সংগঠনটোৱে ।