চিচিবৰগাঁৱত ভয়ংকৰ পথ দুৰ্ঘটনা, থিতাতে নিহত দুজন

চিচিবৰগাঁৱৰ গেলুৱাত নিয়ন্ত্ৰণ হেৰুৱাই নদীত বাগৰিল বাইক ৷ এই পথ দুৰ্ঘটনাত দুজন লোক থিতাতে নিহত হোৱাৰ লগতে এজন আৰোহীৰ অৱস্থা সংকটজন ৷

ধোমাজি/জোনাই 6 ডিচেম্বৰ :ধেমাজি জিলাৰচিচিবৰগাঁৱৰ গেলুৱাত ভয়ংকৰ পথ দুৰ্ঘটনা সংঘটিত হৈছে ৷ নিয়ন্ত্ৰণ হেৰুৱাই নদীত বাগৰিল বাইক ৷ এই পথ দুৰ্ঘটনাত দুজন লোক থিতাতে নিহত হোৱাৰ লগতে এজন আৰোহীৰ অৱস্থা সংকটজন বুলি জানিব পৰা গৈছে ৷

ঘটনাৰ বিৱৰণী অনুসৰি, চিলাপথাৰ আৰক্ষী থানাৰ অন্তৰ্গত চিচিবৰগাঁৱৰ সমীপৰ গেলুৱা নদীৰ দলঙত সংঘটিত হৈছে এই ভয়ংকৰ পথ দুৰ্ঘটনাটো । নিয়ন্ত্ৰণ হেৰুৱাই এখন ৰয়েল এনফিল্ড মটৰচাইকেল দলঙৰ কাষৰ খুঁটা ভাঙি নদীত পৰাৰ ফলতেই সংঘটিত হয় দুৰ্ঘটনাটো ।

জানিব পৰা অনুসৰি, চিচিবৰগাঁও ৰাজহ চক্ৰৰ অধীনৰ আমগুৰি পঞ্চায়তৰ বটুৱাৰ যুৱক দীপাংকৰ পামেগামে মঙলবাৰে এখন ৰয়েল এনফিল্ড মটৰচাইকেল কিনি আনে ৷ তাৰ পিচতেই তেওঁ দুজন বন্ধু ক্ৰমে হৰমোহন কাৰ্ডং আৰু হেমন্ত নৰহক লগত লৈ নিশা প্ৰায় 9 মান বজাত নতুন মটৰ চাইকেলখন দেখুৱাবলৈ তিনিওগৰাকীয়ে বায়েকৰ ঘৰলৈ আহে ।

তাৰ পিচতে বুধবাৰে পুৱা বায়েকৰ ঘৰৰ পৰা আহি থকা অৱস্থাত চিচিবৰগাঁৱৰ সমীপৰ গেলুৱা নদীৰ দলঙত উঠাৰ সময়তে নিয়ন্ত্ৰণ হেৰুৱাই দলঙৰ মূৰৰ খুঁটা ভাঙি নদীত পৰেগৈ বাইকসহ তিনিজন যুৱক । দুৰ্ঘটনাটোত হৰমোহন কাৰ্ডং আৰু হেমন্ত নৰহ থিতাতে নিহত হয় । বাইকৰ চালক দীপাংকৰ পামেগামক মুমূৰ্ষু অৱস্থাত স্থানীয় ৰাইজে উদ্ধাৰ কৰি 108 সেৱাযোগে চিকিৎসালয়লৈ প্ৰেৰণ কৰে ।

জানিব পৰামতে দুৰ্ঘটনাত পতিত হোৱা তিনিওজনৰে ঘৰ বটুৱাত বুলি জানিব পৰা গৈছে । ঘটনাস্থলীত চিচিবৰগাঁও আৰক্ষী উপস্থিত হৈ ইতিমধ্যে মৃতদেহ দুটা উদ্ধাৰ কৰিছে বুলি জানিব পৰা গৈছে । দীপাংকৰ সম্প্ৰতি চিকিৎসাধীন হৈ আছে বুলি জানিব পৰা গৈছে ৷

লগতে পঢ়ক:মনোৰম কপিলীত পৰ্যটকৰ ভিৰ