স্বাস্থ্য বিভাগত নিযুক্তিৰ উচিত তদন্ত দাবী চুতীয়া যুৱ সন্মিলনীৰ

এইবাৰ নিযুক্তি সম্পৰ্কীয় বিসংগতিৰ ক্ষেত্ৰত সৰৱ হৈ পৰিছে সদৌ অসম চুতীয়া যুৱ সন্মিলনী ৷ ধেমাজিৰ স্বাস্থ্য বিভাগৰ ধপাত নিয়ন্ত্ৰণ কোষত ডাটা এণ্ট্ৰি অপাৰেটৰ পদৰ নিযুক্তিৰ ক্ষেত্ৰত বিসংগতি সংঘটিত হোৱাৰ দাবী চুতীয়া যুৱ সন্মিলনীৰ ৷

ধেমাজি,1 ছেপ্তেম্বৰ: কৰ্মসংস্কৃতিৰ নামত ৰাজ্য চৰকাৰৰ একাংশ বিষয়া-কৰ্মচাৰীয়ে নিজৰ খেয়ালখুচি মতে চলাই গৈছে কাম-কাজ ৷ সম্প্ৰতি এই বিষয়ে গুৰুতৰ অভিযোগ উত্থাপন কৰিছে সদৌ অসম চুতীয়া যুৱ সন্মিলনীৰ ধেমাজি জিলা সমিতিৰ সাধাৰণ সম্পাদক মানস প্ৰতীম চুতীয়াই ৷ উত্থাপিত অভিযোগ অনুসৰি, ধেমাজিৰ স্বাস্থ্য বিভাগৰ ধঁপাত নিয়ন্ত্ৰণ কোষৰ ডাটা এণ্ট্ৰী অপাৰেটৰ পদৰ কৰ্মচাৰী মুনমী গগৈৰ মৃত্যু হোৱাত দীৰ্ঘদিনে খালী হৈ থাকে পদটো ৷ কিন্তু ৰহস্যজনকভাৱে এই পদটো পূৰাবলৈ কোনো বিজ্ঞাপন আৰু সাক্ষাৎকাৰ অনুষ্ঠিত কৰা নাছিল ৷ তৎসত্বেও নিজৰ খেয়ালখুচি অনুসৰি বিভাগে উক্ত পদত নিয়োজিত কৰে এগৰাকী ব্যক্তিক ৷ স্বাস্থ্য বিভাগটোৰ এনে মইমতালিৰ বিৰুদ্ধে সম্প্ৰতি সৰৱ হৈ পৰিছে চুতীয়া যুৱ সন্মিলনীৰ লগতে অন্যান্য স্থানীয় দল-সংগঠন ৷

বিষয়টো সন্দৰ্ভত সন্মিলনীৰ জিলা সমিতিৰ সম্পাদকগৰাকীয়ে জানিবলৈ দিয়া অনুসৰি, এই নিযুক্তি কৰ’ণা আতংকৰ মাজতে হোৱা বুলি ব্যক্ত কৰি বিষয়টোৰ পৰা ফালৰি কাটে ৷ কিন্তু একে সময়তে অস্থায়ী চাফাই কৰ্মীৰ পদৰ বাবে বিজ্ঞাপন প্ৰকাশ কৰিছিল ধেমাজিৰ স্বাস্থ্য বিভাগে ৷ সেয়ে বিষয়টোৰ উচিত তদন্ত দাবী কৰি এই কাৰ্যত জড়িত ব্যক্তিক চিনাক্ত কৰি যথোচিত শাস্তি প্ৰদান কৰিবলৈ দাবী জনাইছে সংগঠনটোৱে ৷ অন্যথা পৰৱৰ্তী সময়ত তীব্ৰ আন্দোলন গঢ়ি তোলাৰ হুংকাৰ প্ৰদান কৰে সংগঠনটোৰ ধেমাজি জিলাৰ দায়িত্বত থকা সম্পাদকগৰাকীয়ে ৷

লগতে চাওকঃহাইস্কুল শিক্ষান্ত পৰীক্ষা, 2021 বৰ্ষৰ বাবে 30% পাঠ্যক্ৰম হ্ৰাস কৰাৰ সিদ্ধান্ত ছেবাৰ