পথ দুৰ্ঘটনাত থিতাতে নিহত মাতৃ-কন্যা

ডিমৌৰ 15নং ৰাষ্ট্ৰীয় ঘাইপথত সংঘটিত এক পথ দুৰ্ঘটনাত প্ৰাণ হেৰুৱাইছে মাতৃ-কন্যাই ৷ এটা পৰিয়ালৰে তিনিগৰাকী লোকে জোনাইৰ পৰা গৃহাভিমুখে আহি থকা অৱস্থাতে বাহনৰ নিয়ন্ত্ৰণ হেৰুওৱাৰ ফলত সংঘটিত হয় পথ দুৰ্ঘটনাটো ৷

জোনাই,24 জুন:চিলাপথাৰ ডিমৌত সংঘটিত হৈছে এক ভয়ংকৰ পথ দুৰ্ঘটনা ৷ দুৰ্ঘটনাটোত একেটা পৰিয়ালৰ মাতৃ-কন্যা থিতাতে নিহত হোৱাৰ উপৰিও গুৰুতৰভাৱে আহত হৈছে দুজন ৷ ঘটনাৰ বিৱৰণী অনুসৰি, চিলাপথাৰ আৰক্ষী থানাৰ অন্তৰ্গত ডিমৌৰ 15নং ৰাষ্ট্ৰীয় ঘাইপথেৰে তিনিজনীয়া এটি পৰিয়ালে জোনাইৰ পৰা ঘৰলৈ আহি থকাৰ সময়তে ডিমৌ চাৰিআলিৰ সমীপত বাহনৰ চকা ফুটি নিয়ন্ত্ৰণ হেৰুৱাই পথৰ দাঁতিৰ এজোপা গছত খুন্দা মাৰি দুৰ্ঘটনাত পতিত হয় ৷ ইয়াৰ পিছতে বাহনখনে এটা কালভাৰ্টত খুন্দিয়াই পথৰ দাঁতিত বাগৰি পৰে ৷

ইপিনে বাহনখনত থকা লিখেশ্বৰ সোণোৱাল(৪৬),পত্নী দিপ্তী ওৰফে দীপিকা সোণোৱাল(৪৫) আৰু কন্যা অংকিতা সোণোৱাল(১৫) ৰ লগতে চালক খুলেশ্বৰ সোণোৱাল(৪৫) ক স্থানীয় ৰাইজ আৰু আৰক্ষীয়ে উদ্ধাৰ কৰে যদিও মাতৃ-কন্যাৰ ঘটনাস্থলীতে মৃত্যু হয় ৷ সম্প্ৰতি আন দুগৰাকী ব্যক্তিক চিকিৎসাৰ বাবে ধেমাজি জিলা অসামৰিক চিকিৎসালয়লৈ প্ৰেৰণ কৰা হৈছে ৷

লগতে চাওকঃনাওবৈচাত শিঙৰা নদীয়ে লৈছে ভয়ানক ৰূপ