জোনাই,11 মাৰ্চঃনিজে স্বাৱলম্বী হোৱাৰ লগতে প্ৰদূষণ ৰোধত অৰিহণা যোগাইছে জোনাইৰ এজন যুৱকে ৷ জোনাইৰসূৰজ কুমাৰ পাণ্ডে নামৰ এজন যুৱকে গছৰ পাতেৰে নিৰ্মাণ কৰিছে এবাৰ ব্যৱহাৰযোগ্য থাল-বাতি ৷ প্লাষ্টিক তথা প্ৰদূষণ মুক্ত অসম গঢ়াৰ লক্ষ্যৰে আৰম্ভ কৰিছে গছৰ পাতেৰে থাল-বাতি তৈয়াৰ কৰা এখন ক্ষুদ্ৰ কাৰখানা ৷ যি সময়ত শিক্ষিত নিৱনুৱাই কৰ্মসংস্থাপনৰ অভাৱত দিক-বিদিক হেৰুৱাইছে তেনে সময়তে ধেমাজি জিলাৰ এজন অসমীয়া যুৱকে হাতত লৈছে এই বিশেষ প্ৰচেষ্টা ৷ ধেমাজি জিলাৰ জোনাই মহকুমাৰ অন্তৰ্গত এইগৰাকী শিক্ষিত নিৱনুৱা যুৱকে নিজকে স্বাৱলম্বী কৰাৰ লগতে আগবাঢ়িছে এখন প্লাষ্টিক আৰু প্ৰদূষণ মুক্ত অসম গঢ়াৰ দিশে ৷ সূৰজে প্ৰথমে খেতি-বাতি আৰু পিছত এখন কোপোৰৰ দোকান দি ঘটা পইছাৰে এটা মেচিন কিনে পাতৰ পৰা এই থাল-বাতিসমূহ নিৰ্মাণৰ বাবে ৷
৩ নং মূৰ্কংচেলক গাঁৱৰ নিবাসী নেত্ৰ প্ৰসাদ পাণ্ডে আৰু দুৰ্গা দেৱী পাণ্ডেৰ পুত্ৰ সূৰজ কুমাৰ পাণ্ডে প্ৰথম অৱস্থাত মাৰ্কেটিঙৰ পৰা পাত গোটোৱাৰ কাম নিজেই কৰিছিল ৷ এতিয়া তেওঁ নিজে স্বাৱলম্বী হোৱাৰ লগতে অন্য তিনিগৰাকীক যুৱকক কৰ্মসংস্থাপন দি স্বাৱলম্বী কৰি তুলিছে তেওঁলোককো ৷