দুৰ্গা পূজাৰ প্ৰাক-ক্ষণত বিশেষ নিৰ্দেশনাৱলী জোনাই মহকুমা প্ৰশাসনৰ

কৰ'ণাৰ সংকটকালত শাৰদীয় দুৰ্গোৎসৱৰ অনুষ্ঠিত কৰাক লৈ বিশেষ নীতি-নিৰ্দেশনা জাৰি কৰিছে জোনাই মহকুমা প্ৰশাসনে । জাক-জমকতাৰ পৰিৱৰ্তে অনুষ্টুপীয়াকৈ পূজা আয়োজন কৰিবলৈ পূজা কমিটীসমূহক প্ৰশাসনে আহ্বান জনাইছে। আনকি পূজা মণ্ডপত প্ৰতিষ্ঠা কৰা দেৱী প্ৰতিমাৰ আকাৰৰ ওপৰতো বান্ধি দিয়া হৈছে বিশেষ নিয়ম।

জোনাই,৩০ছেপ্টেম্বৰ: কৰ'ণা মহামাৰীৰ ভয়াৱহতা অব্যাহত থকাৰ পৰিপ্ৰেক্ষিতত অনুষ্টুপীয়াকৈ দুৰ্গা পূজা আয়োজনৰ আহ্বান জনাইছে জোনাই মহকুমা প্ৰশাসনে । বুধবাৰে জোনাই মহকুমা প্ৰশাসনে পূজা কমিটীৰ বিষয়ববীয়াৰে হোৱা এখন বৈঠকত মিলিত হৈ এলানি নিৰ্দেশাৱলী জাৰি কৰিছে । দণ্ডাধীশ প্ৰীতম কুমাৰ দাস আৰু জোনাই ৰাজহ চক্ৰ বিষয়া (সংলগ্ন) নেকিব চৈয়দ বৰুৱাৰ লগতে মহকুমাধিপতি জিমলি শইকীয়া কাকতিও বৈঠকত উপস্থিত থাকে । চৰকাৰৰ নিৰ্দেশনা মানি চলি দুৰ্গা পূজা অনুষ্ঠিত কৰিবলৈ আহ্বান জনাই পূজা মণ্ডপত প্ৰতিষ্ঠা কৰা দেৱী প্ৰতিমাৰ আকাৰৰ ওপৰতো বিশেষ নিয়ম বান্ধি দিয়ে ।

যদিহে কোনো পূজা কমিটীয়ে প্ৰতিমা প্ৰতিষ্ঠা কৰি পূজা আগবঢ়াব বিচাৰে তেন্তে সৰু প্ৰতিমা ৰাখিবলৈ অনুমতি দিছে প্ৰশাসনে । পূজা কমিটীয়ে প্ৰতিমা বিসৰ্জন দিয়াৰ ক্ষেত্ৰতো বাধা আৰোপ কৰা হৈছে । কৰ'ণা মহামাৰী আতংক অব্যাহত থকা সময়লৈকে মণ্ডপৰ ভিতৰতে বেৰৰ ব্যৱস্থা কৰি প্ৰতিমা ৰাখিব লাগিব পূজা কমিটীয়ে ৷ আনহাতে, জাক-জমকতাৰ পৰিৱৰ্তে অনুষ্টুপীয়াকৈ ঘট পূজা আয়োজন কৰিবলৈ আহ্বান জনাইছে প্ৰশাসনে ।

ঘট পূজা আয়োজন কৰাসকলে বিসৰ্জন কৰিব পাৰিব যদিও অধিক লোকে অংশগ্ৰহণ নোৱাৰিব ৷ ইয়াৰ উপৰিও পূজাৰীৰ লগতে পূজা কমিটীৰ সদস্যসকলে আগতীয়াকৈ ৰেপিড টেষ্ট কৰাব লাগিব । লগতে মাস্ক পিন্ধা আৰু চেনিটাইজাৰ পূজা মণ্ডপত ৰখাটো বাধ্যতামূলক কৰা হৈছে ৷ পূজা মণ্ডপত পূজাৰীৰ সৈতে ৩০ জন ভক্ত উপস্থিত থকাৰ অনুমতি দিছে প্ৰশাসনে ৷ দুৰ্গা পূজাৰ প্ৰাক-ক্ষণত প্ৰশাসনে জাৰি কৰা এই নিৰ্দেশনাসমূহ মানি চলিহে এইবাৰৰ দুৰ্গা পূজা অনুষ্ঠিত কৰিব পাৰিব পূজা কমিটীসমূহে।