জোনাই, 26 ফেব্ৰুৱাৰী:অসম তথা অসমৰ বিভিন্ন জনগোষ্ঠীৰ লগতে গোর্খা জনগোষ্ঠীৰ বিভিন্ন সমস্যাৰ সমাধানৰ প্ৰতিশ্ৰুতি দি শাসনলৈ অহা বিজেপি নেতৃত্বাধীন অসম চৰকাৰে গোর্খা সকলৰ সমস্যা সমাধানৰ ক্ষেত্ৰত কোনো গুৰুত্ব প্ৰদান নকৰাৰ প্ৰতিবাদত বৃহস্পতিবাৰে জোনাইত গোৰ্খা সকলে গোৰ্খা গৰ্জন শীৰ্ষক এক প্ৰতিবাদী কাৰ্যসূচী গ্ৰহণ কৰে ৷
সদৌ অসম গোর্খা ছাত্ৰ সন্থা, ধেমাজি জিলা সমিতিৰ উদ্যোগত জোনাই উচ্চতৰ মাধ্যমিক বিদ্যালয়ৰ খেলপথাৰত গোৰ্খাসকলে তেওঁলোকৰ বিভিন্ন সমস্যা সমাধানৰ দাবী উত্থাপন কৰি প্ৰতিবাদ সাব্যস্ত কৰে ৷ প্ৰতিবাদকাৰী সকলে অভিযোগ কৰে যে, গোৰ্খাসকলক জনজাতিকৰণ কৰাৰ বাবে ব্যৱস্থা গ্ৰহণ কৰাৰ লগতে গোৰ্খা সকলৰ বাবে স্বায়ত্ব শাসিত পৰিষদ গঠন আৰু ডি ভোটাৰৰ সমস্যা সমাধানৰ ক্ষেত্ৰত বিজেপি চৰকাৰে কোনো সদিচ্ছা প্ৰকাশ কৰা নাই ৷
প্ৰতিবাদকাৰী সকলে কয় যে, চৰকাৰৰ ফালৰ পৰা তেওঁলোকৰ সমস্যা সমূহ সমাধানৰ ক্ষেত্ৰত কোনো ধৰণৰ সদিচ্ছা প্ৰত্যক্ষ নকৰাৰ পৰিপ্ৰেক্ষিতত গোৰ্খাসকলে তেওঁলোকৰ অধিকাৰ আৰু নায্য প্ৰপ্তিৰ দাবীত এই গোৰ্খা গৰ্জন কাৰ্যসূচী হাতত ল'বলৈ বাধ্য হয় ৷