জোনাই,12 জুলাই: প্ৰায় এমাহে নেৰা-নেপেৰাকৈ দি থকা বৰষুণৰ ফলত ৰাজ্যত ক্ৰমাৎ শোচনীয় ৰূপ ধাৰণ কৰিছে বান পৰিস্থিতিয়ে ৷ ধেমাজি জিলাৰ জোনাইতো অপৰিৱৰ্তিত হৈ আছে বান পৰিস্থিতি ৷ বিগত কিছুদিনৰ তুলনাত জোনাইৰ বান পৰিস্থিতি অধিক শোচনীয় হোৱাৰ আশংকা প্ৰকাশ কৰা হৈছে ৷ জোনাইৰ মাজেৰে বৈ যোৱা চিয়াং,লালী,ব্ৰহ্মপুত্ৰৰ দৰে নদী-উপনদীসমূহ বৰষুণৰ ফলত ইতিমধ্যে ওফন্দি উঠা পৰিলক্ষিত হৈছে ৷ বিগত বছৰৰ তুলনাত এইবছৰ পানীৰ মাত্ৰা বৃদ্ধি পোৱাত বান পৰিস্থিতি অধিক শোচনীয় হোৱাৰ আশংকা প্ৰকাশ কৰা হৈছে ৷ ইতিমধ্যে মহকুমাটোৰ প্ৰায় তিনি শতাধিক গাঁও বুৰ গৈছে বানত ৷
আনহাতে,বানাক্ৰান্তই সম্প্ৰতি আশ্ৰয় গ্ৰহণ কৰিছে ওখ মথাউৰিত ৷ ফলত কিছু কিছু এলেকাত তীব্ৰ খাদ্য সংকটৰ লগতে এটুপি বিশুদ্ধ খোৱাপানীৰ বাবে হাহাকাৰ কৰিবলগীয়া পৰিস্থিতিৰ সৃষ্টি হৈছে বানাক্ৰান্তৰ মাজত ৷ তথ্য অনুসৰি,জোনাইৰ 228 খন গাঁও জলমগ্ন হোৱাৰ লগতে প্ৰায় 80 হাজাৰ লোক গৃহহাৰা হৈছে বানত ৷ সমান্তৰালকৈ 28 হাজাৰ হেক্টৰ কৃষিভূমি বাঢ়নী পানীয়ে বুৰাই পেলোৱাৰ ফলত বিপদৰ সন্মুখীন হৈছে কৃষকসকল ৷ মহকুমা প্ৰশাসনৰ তৰফৰ পৰা বানাক্ৰান্তক উদ্ধাৰৰ বাবে নিয়োজিত কৰা হৈছে এছডিআৰএফ আৰু এনডিআৰএফ বাহিনীৰ ছখনকৈ নাওঁ ৷ লগতে নদীদ্বীপ কবুচাপৰিলৈ ফেৰীৰে খাদ্য সামগ্ৰী স্থানান্তৰ কৰা হৈছে ৷