ধেমাজি, 13 জুন: ধেমাজি জিলাৰ চকুলো খ্যাত জীয়াঢল নদীক নিয়ন্ত্ৰণৰ বাবে বাৰিষা সময়ত চেষ্টা অব্যাহত ৰাখিছে সংশ্লিষ্ট বিভাগে ৷ বৰ্তমান ধেমাজি বৰ্মন গাঁৱত উন্মুক্ত হৈ থকা জীয়াঢলৰ বুকুত ১৬০০ মিটাৰৰ এটা বৃহৎ গাইড বান্ধ নিৰ্মাণৰ কাম অব্যাহত ৰাখিছে বিভাগীয় কৰ্তৃপক্ষই ৷ এইক্ষেত্ৰত নিৰ্মাণৰ লগত জড়িত এগৰাকী ব্যক্তিৰ পৰা জানিব পৰা মতে, চৰকাৰৰ সংশ্লিষ্ট বিভাগৰ সহযোগত ৮০ লাখ টকা ব্যয় সাপেক্ষে ১৬০০ মিটাৰ এটা গাইড বান্ধৰ জৰিয়তে জীয়াঢল নদীক নিয়ন্ত্ৰণ কৰি পুৰণা সূঁতিলৈ ৱোৱাই নিয়াৰ চেষ্টা অব্যাহত ৰখা হৈছে ৷ ইতিমধ্যে ৮০ শতাংশ কাম সম্পূৰ্ণ হোৱাৰ পিছত বাঁহৰ কাম, জিঅ’ মেট আদি কাৰ্পেটিঙৰ কাম আৰম্ভ কৰা হৈছে ৷
সম্প্ৰতি বালিৰ গাইড বান্ধটোত ঠায়ে ঠায়ে জেচিবি আৰু শ্ৰমিকৰ দ্বাৰা কাম কৰি থকা হৈছে ৷ আনফালে জীয়াঢলৰ পানীয়ে কেৱল বালি পেলাই থোৱা অংশ ইতিমধ্যে খহাবলৈ আৰম্ভ কৰিছে ৷ তেনেক্ষেত্ৰত এই বাৰিষাত এই বৃহৎ গাইড বান্ধতো কিমান দিন তিষ্ঠিব পাৰিব সেয়া লক্ষণীয় হ’ব ৷