এটুপি বিশুদ্ধ খোৱাপানীৰ বাবে হাহাকাৰ ধেমাজিৰ লুগুটিবাসীৰ
ধেমাজি,২৭ অক্টোবৰ : জলজীৱন মিছনৰ অধীনত প্ৰতি ঘৰে ঘৰে পানীৰ যোগান ধৰাৰ প্ৰতিশ্ৰুতি দিয়া চৰকাৰখনৰ দিনত এটুপি পানীৰ বাবে হাহাকাৰ কৰিছে একাংশ লোকে । এতিয়াও লেতেৰা পানী সেৱন কৰি জীৱন নিৰ্বাহ কৰিবলগীয়া হৈছে ৰাজ্যৰ বিভিন্ন প্ৰান্তৰ ৰাইজে । ধেমাজিৰ একাংশ ৰাইজেও এতিয়া এটুপি বিশুদ্ধ পানীৰ বাবে কৰিবলগীয়া হৈছে অশেষ কষ্ট ।
এটুপি বিশুদ্ধ খোৱাপানীৰ বাবে হাহাঁকাৰ কৰিবলগীয়া পৰিস্থিতিৰ হৈছে ধেমাজি জিলা জোনাই বিধানসভাৰ সমষ্টিৰ অধীনৰ লুগুটিবাসীয়ে ৷ বিগত ৩/৪ বছৰ ধৰি কামিয়া নদীয়ে তাণ্ডব চলাই জলাকলা খুৱাই আহিছে অঞ্চলবাসীক ৷ আচৰিত কথা এয়ে যে আহিন-কাতি মাহতো খৰস্ৰোতা নদীখনে প্লাৱিত কৰি আহিছে গাঁওখনৰ ঘৰবাৰী, চোতাল, পথাৰ ৷ বিশেষকৈ বৃহত্তৰ লুগুটি আৰু লুগুটি খৰাগড়বাসীয়ে এতিয়া নদীখনৰ কৱলত পৰি এটুপি খোৱাপানীৰ বাবে চোতালে চোতালে খান্দিবলগীয়া হৈছে বালিৰ নাদ ৷