সাংবাদিক আক্ৰমণকাৰীক শাস্তিৰ দাবীত ধেমাজিত সাংবাদিকৰ প্ৰতিবাদ

কৰ্তব্যৰত অৱস্থাতে ধেমাজিৰ চিচিবৰগাঁৱৰ আৰক্ষী চকীৰ ভিতৰতে চিলাপাথাৰ প্ৰেছ ক্লাৱৰ সভাপতি বনমালী মহন্তক দুষ্কৃতিকাৰীয়ে আক্ৰমণ কৰিছিল ৷ আজি উক্ত ঘটনাৰ লগত জড়িত দোষীক শাস্তি প্ৰদানৰ দাবীত ধেমাজি প্ৰেছ ক্লাৱ আৰু জিলা সাংবাদিক সংস্থাৰ বিষয়ববীয়াসকলে ধেমাজি আৰক্ষী অধীক্ষক ৰাকেশ ৰেড্ডীক সাক্ষাৎ কৰে ৷

ধেমাজি, 13 নৱেম্বৰঃ কৰ্তব্যৰত সাংবাদিকক আক্ৰমণৰ ঘটনাৰ প্ৰতিবাদ ধেমাজি প্ৰেছ ক্লাৱৰ সংবাদকৰ্মীসকলৰ ৷ কৰ্তব্যৰত অৱস্থাতে ধেমাজিৰ চিচিবৰগাঁৱৰ আৰক্ষী চকীৰ ভিতৰতে চিলাপাথাৰ প্ৰেছ ক্লাৱৰ সভাপতি বনমালী মহন্তক দুষ্কৃতিকাৰীয়ে আক্ৰমণ কৰিছিল ৷

উল্লেখ্য যে, এটা দুৰ্ঘটনাক কেন্দ্ৰ কৰি চিচিবৰগাঁও আৰক্ষী চকীত নিশা এদল লোকে প্ৰতিবাদ কৰি থকাৰ খবৰ লাভ কৰি কৰ্তব্যৰ খাতিৰত থানালৈ গৈছিল চিলাপথাৰ প্ৰেছ ক্লাৱৰ সভাপতি বনমালী মহন্ত ৷ তেনেসময়তে অৰ্তকিতে ১০/১৫ জনীয়া দুষ্কৃতিকাৰীয়ে সাংবাদিকগৰাকীক উপৰ্যুপৰি আক্ৰমণ কৰাত কোনোমতে নিজকে ৰক্ষাৰ কৰাৰ বাবে থানাৰ ভিতৰৰ নিৰ্দিষ্ট আৰক্ষীৰ কোঠাত গৈ আশ্ৰয় গ্ৰহণ কৰে সাংবাদিকগৰাকীয়ে ৷ নিশাৰ ভাগত এগৰাকী কৰ্তব্যৰত সাংবাদিকক আৰক্ষী চকীৰ ভিতৰতে কৰা এই বৰ্বৰ আক্ৰমণক তীব্ৰ গৰিহণা দিছে বিভিন্ন মহলে ৷

আনহাতে, আজি উক্ত ঘটনাৰ লগত জড়িত দোষীক শাস্তি প্ৰদানৰ দাবীত ধেমাজি প্ৰেছ ক্লাৱ আৰু জিলা সাংবাদিক সংস্থাৰ বিষয়ববীয়াসকলে ধেমাজি আৰক্ষী অধীক্ষক ৰাকেশ ৰেড্ডীক সাক্ষাৎ কৰে ৷ লগতে, আৰক্ষীয়ে তাৎক্ষণিকভাৱে দোষীক গ্ৰেপ্তাৰ কৰিব নোৱাৰিলে পৰৱৰ্তী সময়ত তীব্ৰ প্ৰতিবাদ সাব্যস্ত কৰিব বুলি মন্তব্য কৰে ধেমাজি প্ৰেছ ক্লাৱৰ সভাপতি প্ৰেমানন্দ তালুকদাৰে ৷