ধেমাজি, 20 নৱেন্বৰঃ উকা হ’ল চহা কৃষকৰ সোণগুটি চপোৱা সপোন ৷ বালি,বোকা আৰু পানীৰ মাজত হেপাঁহৰ আঘোণ ৷ আঘোণক লৈ এতিয়া হুমুনিয়াহ কাঢ়িছে ধেমাজিৰ জীয়াঢল আৰু বাটঘৰীয়া পঞ্চায়তৰ কেইবাখনো গাঁৱৰ চহা কৃষকে ৷ বিশেষকৈ আমুলগুৰি, চেচাসহ, শিঙিমাৰী,ভজোগাঁৱৰ কেইবা হেক্টৰ কৃষিভূমি এতিয়া উদং হৈ পৰিছে ৷ বোকা পানীয়ে পুতি পেলাইছে ৰাইজে কষ্টেৰে ৰোপণ কৰা ধানখেতি ৷
উল্লেখ্য যে, জীয়াঢলৰ এটা সুঁতি এই অঞ্চলৰ ফালে অহা বাবেই আঘোণৰ আবতৰীয়া বানত সৰ্বস্বান্ত হ’বলগা হৈছে কেইবাশ কৃষক পৰিয়াল ৷ আনহাতে, চৰকাৰে ৰবি শষ্যৰ বীজ যোগান ধৰিছে যদিও ঘৰৰ চোতাল,বাৰী আদি পানীৰ তলত থকা বাবে সেই সুবিধাখিনিৰ পৰাও বঞ্চিত হৈছে ৰাইজ ৷ সেয়েহে অতি শীঘ্ৰে জীয়াঢলত বান্ধ নিৰ্মাণ কৰাৰ লগতে বন্যাৰ্তৰ প্ৰতি উপযুক্ত ব্যৱস্থা গ্ৰহণ কৰিবলৈ চৰকাৰক আহ্বান দুৰ্ভগীয়া লোকসকলে ৷ অন্যথা আবতৰীয়া বানত সৰ্বস্বান্ত ৰাইজে অনাহাৰে অনিদ্ৰাই কটাব লাগিব জীৱন ৷
