জোনাইৰ পবা বনাঞ্চলৰ পৰা ওলাই অহা এটা সুগৰী পহু উদ্ধাৰ

জোনাইৰ সংৰক্ষিত পবা বনাঞ্চলৰ পৰা নিশা এটা সুগৰী পহু খাদ্যৰ সন্ধানত জনাঞ্চললৈ ওলাই অহাত স্থানীয় লোকে প্ৰত্যক্ষ কৰে আৰু পহুটোক জোনাই আৰক্ষীক গতাই দিয়ে ৷

জোনাই, 3 জুন : জোনাইত অৰণ্যৰ পৰা জনাঞ্চললৈ ওলাই আহিল এটা সুগৰী পহু ৷ ধেমাজি জিলাৰ জোনাইৰ সংৰক্ষিত পবা বনাঞ্চলৰ পৰা নিশা এটা সুগৰী পহু খাদ্যৰ সন্ধানত ওলাই অহা বুলি আশংকা কৰিছে স্থানীয় ৰাইজে ৷ জোনাইৰ মূৰ্কংচেলেক গাঁৱৰ পাচতে নেপালী বস্তিৰ জুবলী স্কুলৰ কাষত দিশহাৰা হৈ থকা পহুটোক স্থানীয় লোকে প্ৰত্যক্ষ কৰে ।

পহুটোৰ উপস্থিতিৰ কথা গম পোৱাৰ লগে লগে অঞ্চলটোত বহু লোকৰ সমাগম হয় । পিছে অজস্ৰ মানুহৰ সমাগম দেখি হৰিণা পহুটো উক্ত স্থান এৰি পলাবলৈ চেষ্টা কৰে যদিও একাংশ প্ৰকৃতিপ্ৰেমী ৰাইজে সুগৰী পহুটোক দুষ্ট চক্ৰৰ কবলত পৰা আশংকাত কৰি জোনাই আৰক্ষীক গতাই দিয়ে ৷

ইয়াৰ পাচতে জোনাই আৰক্ষীয়ে বন বিভাগক খবৰ দিয়ে ৷ পহুটোৰ শৰীৰৰ বিভিন্ন অংশত আঘাতপ্ৰাপ্ত হোৱাৰ বাবে জোনাই বন বিভাগে মহকুমা পশু চিকিৎসা কেন্দ্ৰলৈ চিকিৎসাৰ বাবে লৈ যায় ৷ চিকিৎসা প্ৰদান কৰাৰ পাচতে জোনাই বন বিভাগে পুনৰ পবা বনাঞ্চলৰ লেকু বিটৰ কাষত মুকলি কৰি দিয়ে সুগৰী পহুটো ৷

লগতে পঢ়ক : ডোভাল, ভাল্লা, "ৰ"ৰ মুৰব্বীৰে কি কথা পাতিলে মুখ্যমন্ত্ৰীয়ে !