জোনাই,8 ছেপ্তেম্বৰঃ অৰুনাচল প্ৰদেশৰ চেৰামত চিয়াং নৈয়ে সৃষ্টি কৰিছে ব্যাপক গৰাখহনীয়া ৷ বাৰিষা নৈখনৰ জলপৃষ্ঠ অস্বাভাৱিক ভাৱে বৃদ্ধি পোৱাৰ ফলত পূৱ চিয়াং জিলাৰ মেৱ অঞ্চলত বান আৰু গৰাখহনীয়া ধাৰণ কৰিছে ভয়ংকৰ ৰূপ ৷ বিগত বৰ্ষত ইতিমধ্যেই জিলাখনৰ নামচিং,কোংকুল, চেৰেণ,বৰঘূলিকে ধৰি প্ৰায় ১০ খনৰো অধিক গাঁৱৰ দুই হেজাৰ হেক্টৰ কৃষি ভূমি জাহ গৈছে চিয়াং নৈৰ বুকুত । ইয়াকে লৈ সম্প্ৰতি শংকিত হৈ পৰিছে নৈপৰীয়া ৰাইজ ৷
আনহাতে, এইবেলিও গৰাখহনীয়াত চিগাৰ গাঁৱত থকা একমাত্ৰ প্ৰাথমিক বিদ্যালয়খনৰ লগতে প্ৰায় চাৰিটাকৈ বাসগৃহ নৈৰ বুকুত জাহ যোৱাৰ উপৰিও পাচিঘাট আৰু শদিয়া সংযোগী গড়কাপ্তানী পথতো বহু ঠাইত খহাই পেলাইছে ৷ নৈখনৰ গৰাখহনীয়া ৰোধৰ ক্ষেত্ৰত চৰকাৰ তথা প্ৰশাসনে কোনো গুৰুত্ব আৰোপ নকৰাৰ ফলত গাঁৱৰ ৰাইজে শ্ৰমদানেৰে শিলৰ স্পাৰ লগতে বাঁহৰ পাৰকুপাইন দি গৰাখহনীয়া ৰোধ কৰাৰ চেষ্টা অব্যাহত ৰাখিছে । কিন্তু ইয়াৰ পিছতো গৰাখহনীয়া ৰোধ কৰিবলৈ সক্ষম হোৱা নাই ৰাইজ ৷ সেয়েহে অতিশীঘ্ৰে চৰকাৰক ব্যৱস্থা গ্ৰহণৰ বাবে আহ্বান দুৰ্ভগীয়া গাঁওবাসীৰ ৷
