জোনাই, 7 ছেপ্তেম্বৰঃ গ্ৰাম্য অঞ্চলত বিজ্ঞান সজাগতা তথা শিক্ষাৰ্থীসকলৰ মাজত বৈজ্ঞানিক মনোভাৱ গঢ়ি তোলাৰ উদ্দেশ্যে ধেমাজি জিলাত অনুষ্ঠিত কৰা হয় বিজ্ঞান মেলাৰ লগতে সজাগতা সভা ৷ অসম চৰকাৰৰ বিজ্ঞান প্ৰযুক্তি বিভাগৰ সহযোগত অসম বিজ্ঞান সমিতিৰ জোনাই শাখাৰ উদ্যোগত শুক্ৰবাৰৰ পৰা দুদিনীয়াকৈ অনুষ্ঠিত হয় শীৰ্ষক কাৰ্যসূচী ৷ জোনাইৰ কেকেপি স্কুলত বিজ্ঞান সজাগতা সভা অনুষ্ঠিত হোৱাৰ লগতে তেলাম ট্ৰাইবেল স্কুলত গ্ৰাম্য বিজ্ঞান মেলাখন অনুষ্ঠিত হৈ যায় ৷
উক্ত কাৰ্যসূচীত অনুষ্ঠিত হোৱা বিজ্ঞান আৰ্হি প্ৰতিযোগিতা, পৰিৱেশ প্ৰদুষণত প্লাষ্টিকৰ প্ৰভাৱ, অন্ধবিশ্বাস আৰু সমাজৰ ওপৰত ইয়াৰ প্ৰভাৱ শীৰ্ষক ৰচনা প্ৰতিযোগিতা, পৰিৱেশ আৰু স্বাস্থ্য শীৰ্ষক আকস্মিক বক্তৃতা আদি বিভিন্ন প্ৰতিযোগিতা তথা সভাত জোনাইৰ বিভিন্ন বিদ্যালয়ৰ শিক্ষাৰ্থীয়ে অংশগ্ৰহণ কৰে ৷
দুদিনীয়াকৈ অনুষ্ঠিত হোৱা এই কাৰ্যসূচীত অংশগ্ৰহণ কৰে কেকেপি হাইস্কুলৰ প্ৰধান শিক্ষক, জোনাই বিজ্ঞান শাখাৰ সদস্য বিজয় কুমাৰ পেগু, শিক্ষক তোষেশ্বৰ মিৰি আগৰৱালা, ডাঃ জ্যোতিষ দলে, অসম বিজ্ঞান সমিতিৰ জোনাই শাখাৰ কাৰ্যকৰী সভাপতি প্ৰদীপ গগৈকে ধৰি বহুসংখ্যক স্থানীয় লোক তথা অভিভাৱকৰ লগতে শিক্ষাৰ্থীসকল ৷
