ধেমাজি,12 অক্টোবৰ: সপ্তাহত দুদিন ডিব্ৰুগড়ৰ পৰা বগীবিল দলং হৈ ধেমাজি জিলাৰ মাজেৰে দিল্লীলৈ চলিব দ্ৰুতবেগী ৰাজধানী এক্সপ্ৰেছ ৷ বহু প্ৰত্যাশিত এক্সপ্ৰেছখন সোমবাৰে নিশা ধেমাজি ৰে’লৱে ষ্টেচনৰ মাজেৰে প্ৰথমবাৰৰ বাবে অতিক্ৰম কৰিব ৷ এই ৰাজধানী ৰে’লক আদৰণি জনাইছে ধেমাজিৰ বিভিন্ন দল-সংগঠনে ৷
ধেমাজি ৰে’লৱে ষ্টেচনত ৰাজধানী এক্সপ্ৰেছৰ বাবে ষ্ট’পেজৰ দাবী এইক্ষেত্ৰত সদৌ ধেমাজি জিলা ছাত্ৰ সন্থাই কয় যে,বগীবিল দলং হোৱাৰ পৰাই ডিব্ৰুগড় আৰু নতুন দিল্লীৰ মাজত এখন ৰাজধানী এক্সপ্ৰেছ ৰে’ল চলোৱাৰ দাবী উত্থাপন কৰি আহিছিল ধেমাজি আছু তথা ধেমাজিবাসী ৰাইজে । অৱশেষত ছাত্র সন্থা তথা ৰাইজৰ বাৰম্বাৰ দাবীৰ প্ৰতি সহাৰি জনাই উত্তৰ-পূৱ সীমান্ত ৰে’লৱেই সোমবাৰৰ পৰা ৰাজধানী এক্সপ্ৰেছ চলোৱাৰ যি সিদ্ধান্ত গ্ৰহণ কৰিছে সেই সিদ্ধান্তক আদৰণি জনাইছে আছুৱে ।
কিন্তু ডিব্ৰুগড়ৰ পৰা যাত্রা আৰম্ভ কৰিবলগীয়া ৰে’লখনৰ ধেমাজি জিলাত কোনো ষ্ট’পেজ নাই । ধেমাজি জিলাৰ সদৰ হিচাপে তথা ঢকুৱাখানা মহকুমা আৰু ইয়াৰ দাঁতিকাষৰীয়া অৰুণাচল প্ৰদেশৰ যাত্রীসকলৰ সুবিধাৰ্থে জিলা সদৰত ৰাজধানী এক্সপ্ৰেছৰ ষ্ট’পেজৰ ব্যৱস্থা কৰিবলৈ আছুৱে দাবী জনাইছে ।
জিলা ছাত্র সন্থাৰ সভাপতি দিপক শৰ্মাই জিলাৰ ৰাইজৰ তথা দিল্লীত অধ্যয়নৰত আৰু কৰ্মৰত ছাত্র-ছাত্রীসকলৰ যাতায়াতৰ সুবিধাৰ্থে শীঘ্ৰেই ধেমাজি সদৰত ষ্ট’পেজ দিয়াৰ বাবে উত্তৰ পূৱ সীমান্ত ৰে’লৱে কৰ্তৃপক্ষক দাবী জনাইছে ৷ লগতে জিলাখনৰ প্ৰতিটো ৰে’লৱে ক্ৰচিঙত পৰ্যাপ্ত পৰিমাণে সুৰক্ষা ব্যৱস্থা গ্ৰহণ কৰিবলৈ দাবী জনায় আছুৱে ৷
লগতে পঢ়ক:বিটিচি পৰিষদীয় নিৰ্বাচনত বিজেপি দল অংশীদাৰ হ'ব: ৰঞ্জিত দাস
