জোনাই, 20 নৱেম্বৰ: হৰি নামৰ ধ্বনিত বৈকুণ্ঠধামলৈ পৰিণত চিমেন চাপৰি চেৰেণ পথাৰৰ পৰমানন্দ আতা সমন্বয় ক্ষেত্ৰ ৷ শ্ৰীমন্ত শংকৰদেৱ সংঘৰ ৯২ সংখ্যক জোনাই বাৰ্ষিক অধিৱেশনৰ লাইখুটা দেওবাৰে স্থাপন কৰিলে পদাধিকাৰ কমলাকান্ত গগৈয়ে ৷ বিধায়ক ভূৱন পেগুৱে স্থাপন কৰিলে স্থায়ী নামঘৰৰ মুল খুটাৰ আধাৰশিলা (92th Jonai Annual Conference foundation stone laid)৷
চলিত বৰ্ষৰ 10,11 আৰু 12 ফেব্ৰুৱাৰীত তিনিদিনীয়া কাৰ্যসূচীৰে উত্তৰ-পূব ভাৰতৰ সৰ্ববৃহত্তম ধৰ্মীয় তথা সাংস্কৃতিক অনুষ্ঠান শ্ৰীমন্ত শংকৰদেৱ সংঘৰ ৯২ সংখ্যক বাৰ্ষিক অধিৱেশন (Srimanta Sankardeva Sangha 92th Annual Conference)২০২৩ খন সংঘৰ জোনাই জিলা শাখাৰ আতিথ্যত গুৰুজনাৰ একান্ত জনজাতীয় ভক্ত পৰমানন্দ আতা সমন্বয় ক্ষেত্ৰত অনুস্থিত হ'ব ৷ দেওবাৰে শ্ৰীমন্ত শংকৰদেৱ সংঘৰ ৯২ সংখ্যক জোনাই বাৰ্ষিক অধিৱেশনৰ পবিত্ৰ লাইখটা স্থাপন কৰা হয় ৷
পুৱা ৬-৩০ বজাত ধেমাজি জিলাৰ চিমেন চাপৰি চেৰেণ পথাৰৰ পৰমানন্দ আতা সমন্বয় ক্ষেত্ৰত জিলা সেৱা বাহিনীৰ নেতৃত্বত পৰিৱেশ নিকাকৰণ হয় । পুৱা ৭ বজাত শ্ৰীমন্ত শংকৰদেৱ সংঘৰ জোনাই জিলা শাখাৰ নামঘৰত শৰণ সদস্য নামাচাৰ্য্য শুভ গগৈৰ দ্বাৰা নাম প্ৰসংগ কৰাৰ পাছত পুৱা ১০ বজাত পৰম্পৰা অনুসৰি অধিৱেশনৰ পবিত্ৰ লাইখুটা স্থাপন কৰে শ্ৰীমন্ত শংকৰদেৱ সংঘৰ পদাধিকাৰ কমলাকান্ত গগৈয়ে (92th Annual Conference foundation stone laid) ৷
পুৱা ১১ বজাত স্থায়ী নামঘৰৰ মূল খুঁটাৰ আধাৰশিলা স্থাপন কৰে জোনাইৰ বিধায়ক ভূবন পেগুৱে (Jonai MLA Bhuban Pegu) ৷ দিনৰ ১১-৩০ বজাত শ্ৰীমন্ত শংকৰদেৱ সংঘৰ পদাধিকাৰ কমলাকান্ত গগৈয়ে সভাপতিত্বত অনুষ্ঠিত কৰা হয় লাইখুটা স্থাপনৰ মুকলি সভা ৷ সভাখন উদ্ধোধন কৰি শ্ৰীমন্ত শংকৰদেৱ সংঘৰ প্ৰধান সম্পাদক বাবুল বৰাই কয় যে শ্ৰীমন্ত শংকৰদেৱ সংঘই সকলো জাতি-জনগোষ্ঠী, ভাষা, সংস্কৃতিৰ লোকক লৈ বৃহত্তৰ অসমীয়া জাতি গঠনত সৱল ভূমিকা গ্ৰহণ কৰি আহিছে ৷ মহাপুৰুষজনাৰ অসমীয়া জাতিৰ ভাষা-সংস্কৃতি-কলা-কৃষ্টিৰ পথাৰখন বিকশিত কৰি এখন সমৃদ্ধিশালী সমাজ নিৰ্মাণ কৰাৰ যি আদৰ্শ, সেই আদৰ্শৰে আজি শ্ৰীমন্ত শংকৰদেৱ সংঘই নিৰৱচিন্নভাৱে কাম কৰি আহিছে ৷
শ্ৰীমন্ত শংকৰদেৱ সংঘৰ সদস্য,সংগীৰ সংখ্যা বৰ্তমান চল্লিছ লাখৰো অধিক ৷ শ্ৰীমন্ত শংকৰদেৱ সংঘৰ এবাৰ সদস্য তথা সংগী হ'লে আজীৱন সদস্য তথা সংগী হৈ থাকিব নোৱাৰে ৷ পঞ্জীয়নভুক্ত সদস্য-সংগীসকলৰ বাবে বছৰি নবীকৰণৰ প্ৰক্ৰিয়া আছে ৷ শ্ৰীমন্ত শংকৰদেৱ সংঘৰ ৫৫ খন জিলা সমিতি আছে । কোঁচবিহাৰ, পশ্চিমবংগ, মেঘালয়, অৰুণাচলত শ্ৰীমন্ত শংকৰদেৱ সংঘৰ জিলা সমিতি আছে আৰু কম দিনৰ ভিতৰত মহাৰাষ্ট্ৰৰ নাচিকত আৰু জলপাইগুৰিতো নতুন জিলা সমিতি গঠনৰ প্ৰক্ৰিয়া চলি আছে ৷
শ্ৰীমন্ত শংকৰদেৱ সংঘৰ লক্ষ-লক্ষ সদস্যই প্ৰতিদিনে, প্ৰতিটো মাহে কিবা নহয় কিবা সমাজ কল্যাণমূলক কাৰ্যসূচী ৰূপায়ণ কৰি আহিছে ৷ সেয়া ৰক্ত দানেই হওঁক, নেত্ৰ দানেই হওঁক ৷ কৰ’ণাৰ সময়চোৱাতো শ্ৰীমন্ত শংকৰদেৱ সংঘই জনকল্যাণকামী কৰ্মত নিয়োজিত হৈ আহিছে ৷ শ্ৰীমন্ত শংকৰদেৱ সংঘৰ অধীনত বৰ্তমান ৰাজ্যত মুঠ ৫৬ খন বিদ্যালয় আছে আৰু অসম চৰকাৰে ১২ খন বিদ্যালয়ক উচ্চতৰ মাধ্যমিক বিদ্যালয়লৈ উন্নীত কৰিছে ৷