দৰঙৰ কৌপাতী চাহ বাগিছাত 'মেন ভাৰ্ছেছ ৱাইল্ড'

দৰঙৰ কৌপাতী চাহ বাগিছাৰ শ্ৰমিক সকলৰ সৈতে বৃহৎ পৰ্দাত প্ৰধানমন্ত্ৰী মোদীৰ অভিনীত 'মেন ভাৰ্ছেছ ৱাইল্ড' অনুষ্ঠান উপভোগ সাংসদ দিলীপ শইকীয়াৰ

দলগাঁও,13 আগষ্ট : ডিছক'ভাৰী চেনেলত বিশ্বৰ বিভিন্ন দেশৰ সৈতে ভাৰততো কালি নিশা ৯ বজাৰ পৰা সম্প্ৰচাৰিত হ'ল ভাৰতৰ প্ৰধানমন্ত্ৰী নৰেন্দ্ৰ মোদী অভিনীত 'মেন ভাৰ্ছেছ ৱাইল্ড' নামৰ ধাৰবাহিক টেলিভিছন অনুষ্ঠানটোৰ বিশেষ খণ্ড ৷ লণ্ডনৰ প্ৰাক্তন সেনা বিষয়া বিয়েৰ গ্ৰীলছ অভিনীত প্ৰকৃতিৰ সৈতে সহবাস কৰা এই দু:সাহসিক ক্ৰীড়াৰ অনুষ্ঠান 'মেন ভাৰ্ছেছ ৱাইল্ড' ধাৰাবাহিক টেলিভিছন অনুষ্ঠানখন ডিছক'ভাৰী চেনেলযোগে সম্প্ৰচাৰ কৰা হয় ৷ প্ৰধানমন্ত্ৰী নৰেন্দ্ৰ মোদী অভিনীত 'মেন ভাৰ্ছেছ ৱাইল্ড'ৰ এই বিশেষ খণ্ডটো বাগিচাৰ শ্ৰমিক সকলৰ বাবে পোনপটীয়া সম্প্ৰচাৰৰ ব্যৱস্থা কৰা হয় দৰঙৰ কৌপাতী চাহ বাগিচাত ৷ ভাৰতৰ প্ৰধানমন্ত্ৰী গৰাকীৰ এনে ৰোমাঞ্চকৰ অভিযানৰ বিশেষ খণ্ডটো ডাঙৰ পৰ্দাত বাগিচাখনৰ শ্ৰমিক সকলৰ সৈতে একেলগে পথাৰত উপভোগ কৰিলে মঙলদৈ লোকসভা সমষ্টিৰ সাংসদ দিলীপ শইকীয়াই ৷ ঘৰত টিভি নথকা চাহ শ্ৰমিক সকলে এনেদৰে কিনকিনিয়া বৰষুণৰ মাজতো ছাতি লৈ পথাৰত বহি উপভোগ কৰিলে এই বিশেষ খণ্ডটো ৷ উল্লেখযোগ্য যে ১৮০ খন দেশত ৫ টা ভাষাত একেলগে সম্প্ৰচাৰিত হয় প্ৰধানমন্ত্ৰী নৰেন্দ্ৰ মোদী অভিনীত 'মেন ভাৰ্ছেছ ৱাইল্ড'ৰ এই বিশেষ খণ্ডটো ৷