মঙলদৈ, ১ আগষ্ট:মঙলদৈ মহৰ্ষি বিদ্যা মন্দিৰত ৰাষ্ট্ৰীয় বজৰং দলে শিবিৰ পাতি অস্ত্ৰ চালনাৰ প্ৰশিক্ষণ দিয়াৰ ঘটনাৰ প্ৰতিক্ৰিয়া আজিও অব্যাহত আছে । আৰক্ষী সঞ্চালক প্ৰধান জি পি সিঙে দৰং আৰক্ষীক কঠোৰ নিৰ্দেশ দিয়াৰ পিছতে মঙলদৈ আৰক্ষীয়ে তদন্ত অব্যাহত ৰাখিছে । মঙলদৈ থানাত ৩৫৭নং গোচৰ ৰুজু কৰি ভাৰতীয় দণ্ডবিধিৰ ১৫৩ এ/৩৪ ধাৰাত গোচৰ ৰুজু কৰা হৈছে । আনহাতে নিশাই মহৰ্ষি বিদ্যালয়ৰ অধ্যক্ষ আৰু প্ৰশাসনিক বিষয়াজনক আৰক্ষীয়ে আটক কৰে ।
উল্লেখ্য যে ৰাষ্ট্ৰীয় বজৰং দলে অস্ত্ৰ চালনাৰ প্রশিক্ষণ দিয়া সন্দৰ্ভত ছ‘চিয়েল মিডিয়াত ভাইৰেল হোৱাৰ পিছতেই মঙলদৈ আৰক্ষীয়ে গোচৰ ৰুজু কৰি তদন্ত আৰম্ভ কৰিছে । আনহাতে মঙলদৈত বজৰং দলৰ অস্ত্ৰ চালনাৰ প্ৰশিক্ষণকলৈ বিভিন্ন দল-সংগঠনৰ প্ৰতিক্ৰিয়াৰ পাচতে ফাদিল হৈছে নতুন তথ্য । জানিব পৰা মতে যোগ প্ৰশিক্ষণ শিবিৰৰ নামত মঙলদৈৰ মহর্ষি বিদ্যামন্দিৰ কৰ্তৃপক্ষৰ পৰা বজৰং দলে লৈছিল অনুমতি । কর্মসংস্থাপন, নিচামুক্ত সমাজ গঢ়িবলৈ এই শিবিৰ আয়োজন কৰা বুলি বিদ্যালয় কর্তৃপক্ষক সংগঠনটিয়ে উল্লেখ কৰিছিল ।
বিদ্যালয় কৰ্তৃপক্ষৰ সকলো নিয়ম মানি চলাৰ কথা কৈছিল বজৰংগ দলে । বজৰং দলৰ সমদলৰ বিষয়ে সকলো কথা জিলা কৰ্তৃপক্ষই জানিছিল । এই সমদলৰ বাবে বজৰং দলে উপায়ুক্তৰ কাৰ্যালয়ৰ পৰা অনুমতি লোৱাৰ কথাও পোহৰলৈ আহিছে । সোমবাৰে আৰক্ষীয়ে চলোৱা অনুসন্ধানৰ অন্তত আৰক্ষীয়ে বজৰং দলে অস্ত্ৰ প্ৰশিক্ষণৰ নামত পুতলা পিষ্টল আৰু এয়াৰগান ব্যৱহাৰ কৰা বুলি উল্লেখ কৰিছিল । মঙলদৈ আৰক্ষীয়ে বজৰংগ দলৰ অস্ত্ৰ প্ৰশিক্ষণৰ বিৰুদ্ধে মঙলদৈ সদৰ থানাত গোচৰ ৰুজু কৰি আজি সোধপোছৰ বাবে মঙলদৈ সদৰ আৰক্ষীয়ে আটক কৰিছে মহৰ্ষি বিদ্যা মন্দিৰৰ অধ্যক্ষ হেমন্ত পায়েং আৰু ৰত্ন দাসক ।