স্ব-ইচ্ছাই কটাইছে বন্দীত্বৰ জীৱন

পত্নীসহ পুত্ৰ কন্যাৰে এটা সুখী পৰিয়াল থকা স্বত্বেও সৰু কোঠালিত এগৰাকী ব্যক্তিয়ে সুদীৰ্ঘ 6/7 বছৰ ধৰি স্ব-ইচ্ছাই কটাইছে বন্দীত্বৰ জীৱন, সৃষ্টি হৈছে ৰহস্যৰ

খাৰুপেটীয়া, 6 জুলাইঃ খাৰুপেটীয়াৰ নিকটৱৰ্তী ঘনশিমূলি গাঁৱৰ মতলেবুদ্দিন নামৰ এগৰাকী ব্যক্তিয়ে সুদীৰ্ঘ 6/7 বছৰ ধৰি এটা সৰু কোঠালিত স্ব-ইচ্ছাই অতিবাহিত কৰিছে বন্দীত্বৰ জীৱন । 55 বছৰীয়া ব্যক্তিজনৰ পত্নীৰ লগতে তিনিটা পুত্ৰ আৰু দুগৰাকী কন্যা সন্তানসহ এটা সুখী পৰিয়াল থকা স্বত্বেও কিয় এটা সৰু কোঠালিত বন্দীত্বৰ জীৱন কটাইছে তাক লৈ ৰহস্যৰ সৃষ্টি হৈছে । উল্লেখযোগ্য যে, এখন আঁঠুৱা আৰু এখন সৰু বিচনা থকা কোঠাটো ভিতৰৰ পৰা বন্ধ কৰি নিজকে আৱদ্ধ কৰি ৰাখে ব্যক্তি জনে । কেৱল পৰিয়ালৰ মানুহক মাজে সময়ে দুই-এষাৰ কথাৰ উত্তৰ দিয়ে যদিও কোঠাটোৰ পৰা বাহিৰলৈ ওলোৱা আজিলৈকে কাৰো দৃষ্টিগোচৰ হোৱা নাই । পৰিয়ালৰ লোকে জানিবলৈ দিয়া মতে, নিজৰ কন্যা আৰু পুত্ৰৰ বিয়াৰ সময়তো, আনকি নিজৰ পৰিয়াল তথা আত্মীয়ৰ মৃত্যুৰ সময়তো বন্ধ কোঠালিৰ পৰা ওলোৱা নাছিল লোকজন । সময় মতে পৰিয়ালৰ লোকে দৰ্জাৰ তলেদি খাদ্য যোগান ধৰে আৰু বন্দী মতলেবুদ্দিনে কোঠাটোৰ ভিতৰতে আহাৰ গ্ৰহণ কৰে । ইয়াৰোপৰি আশ্চৰ্যৰ কথা যে, কোঠাটোত শৌচালয়ৰ কোনো ধৰণৰ ব্যৱস্থা নথকাৰ সত্বেও ইমান দিনে বন্দী হৈ থকা সৰু কোঠালিৰ পৰা মলমূত্ৰৰ কোনো দুৰ্গন্ধ ওলোৱা নাই । আনহাতে কি কাৰণত মতলেবুদ্দিনে স্ব-ইচ্ছাই এনে ধৰণৰ বন্দীত্বৰ জীৱন অতিবাহিত কৰিছে এই সম্পৰ্কে জ্ঞাত নহয় পৰিয়ালৰ লোক ।