আৰ্থিক দৈন্যতাক নেঁওচি দৰঙৰ এগৰাকী প্ৰতিভাৱান ছাত্ৰী

মনৰ প্ৰৱল ইচ্ছাৰে আৰ্থিক দৈন্যতাক নেঁওচি উচ্চতৰ মাধ্যমিকত সাফল্য লাভ কৰিলে দিপীলাৰ সমলা গাঁৱৰ ধৰিত্ৰী তামুলীয়ে, ৮৬ শতাংশ নম্বৰেৰে সাফল্য লাভ কৰা ধৰিত্ৰীৰ সপোন এজন প্ৰশাসনিক বিষয়া হোৱাৰ ৷

দৰং,২৬মে' : মনত যেতিয়া প্ৰৱল ইচ্ছা থাকে তেতিয়া আৰ্থিক দৈন্যতায়ো যেন হাৰ মানিব লগা হয় প্ৰতিভাৰ সন্মুখত । তাকেই প্ৰমাণিত কৰি দেখুৱালে দিপীলাৰ সমলা গাঁৱৰ ধৰিত্ৰী তামুলীয়ে । শনিবাৰে ঘোষিত হোৱা উচ্চতৰ মাধ্যমিক পৰীক্ষাত ধৰিত্ৰীয়ে ৮৬ শতাংশ নম্বৰেৰে উত্তীৰ্ণ হয় । সৰুৰে পৰা মেধাসম্পন্ন ছাত্ৰীগৰাকীক আৰ্থিক দৈন্যতাৰ বাবে পিতৃ -মাতৃয়ে হাইস্কুল শিক্ষান্ত পৰীক্ষাৰ ফলাফলৰ পিছতে পঢ়ুৱাবলৈ অসমৰ্থ হোৱাত ছাত্ৰীগৰাকীৰ পঢ়াৰ সকলো দায়িত্ব বহন কৰিবলৈ আগবাঢ়ি আহিছিল মংগলদৈৰ বৰলুইত ভেলি একাডেমী ৷ এই একাডেমীৰ পৰাই ছাত্ৰীগৰাকীয়ে উচ্চতৰ মাধ্যমিক পৰীক্ষাত কলা শাখাৰ পৰা সকলো বিষয়ত লেটাৰ সহ ৮৬ শতাংশ লাভ কৰিবলৈ সক্ষম হয় ৷ কিন্তু ছাত্ৰীগৰাকীৰ উন্নত ফলাফলত এতিয়া কান্দোনত ভাগি পৰিছে পিতৃ-মাতৃ ৷ কিয়নো মেধাবী ছাত্ৰীগৰাকীৰ ভৱিষ্যতে এগৰাকী প্ৰশাসনিক বিষয়া হোৱাৰ সপোন যদিও,আৰ্থিক দুৰৱস্থাৰ বাবে ধৰিত্ৰীৰ সপোন বাস্তৱত পূৰণ কৰিব পৰা সামৰ্থ নাই ছাত্ৰীগৰাকীৰ পিতৃ-মাতৃৰ । যাৰ বাবে ধৰিত্ৰীয়ে নিজৰ সপোন বাস্তৱত সফল কৰিবলৈ ৰাইজৰ পৰা বিচাৰিছে অলপ সহায় আৰু সহযোগিতা ।