দলগাঁৱত যুৱতীৰ ৰহস্যজনক মৃত্যু

প্ৰেমৰ এক কৰুণ পৰিনতি । দলগাঁৱত এগৰাকী যুৱতীৰ ৰহস্যজনক মৃত্যু । মৃত যুৱতী গৰাকী দলগাঁও থানাৰ অন্তৰ্গত নগাঁৱৰ এলিজা পাৰবিন বুলি জানিব পৰা গৈছে ৷

দলগাঁও, 12 ছেপ্টেম্বৰ: প্ৰেমৰ এক কৰুণ পৰিণতি হিচাবে দলগাঁৱত মৃত্যুক সাৱতিলে এগৰাকী যুৱতীয়ে । দলগাঁও আৰক্ষীৰ তত্বাৱধানত এলিজা পাৰবিন নামৰ এগৰাকী যুৱতীক ধূলা মহিলা হোষ্টেল নামৰ এটা নিৱাসত ৰখাৰ এদিন পিছতে 11 ছেপ্টেম্বৰত মৃত অৱস্থাত উদ্ধাৰ হ’ল যুৱতীগৰাকী৷ পুৱা বাথৰুমৰ পৰা ৰহস্যজনক ভাৱে উদ্ধাৰ হয় এলিজা পাৰবিনৰ মৃতদেহ ।

জানিব পৰা মতে, দীৰ্ঘদিন ধৰি যুৱতী গৰাকীৰে প্ৰেমৰ সম্পৰ্ক আছিল ৰৌতা থানাৰ অন্তৰ্গত আমিনপাৰা গাঁৱৰ ছফিকুল ইছলাম নামৰ এজন যুৱকৰ সৈতে । প্ৰতাৰক প্ৰেমিকে অন্য এগৰাকী যুৱতীক বিয়া পতাৰ খবৰ জানিব পাৰি এলিজা পাৰবিন উপস্থিত হৈছিল প্ৰেমিক ছফিকুলৰ ঘৰত । ইফালে প্ৰেমিকৰ ঘৰৰ পৰা এলিজাক উদ্ধাৰৰ বাবে ৰৌতা আৰক্ষীৰ এটা দল উপস্থিত হয়৷ আৰক্ষীৰ উপস্থিতিতেই প্ৰেমিকৰ পৰিয়ালে যুৱতী গৰাকীৰ ওপৰত চলাই শাৰীৰিক নিৰ্যাতন ।

অৱশ্যে ৰৌতা আৰক্ষীয়ে যুৱতী গৰাকীক সেই স্থানৰ পৰা উদ্ধাৰ কৰি দলগাঁও আৰক্ষীক নিশাই চমজাই দিছিল । দলগাঁও আৰক্ষীয়ে এলিজা পাৰবিনক চমজি লৈ নিশাই ধূলা মহিলা হোষ্টেল নামৰ এটা নিৱাসত ৰাখে যদিও পুৱা ৰহস্যজনক ভাৱে যুৱতী গৰাকীৰ মৃতদেহ উদ্ধাৰ হয় নিৱাসটোৰ বাথৰুমৰ পৰা । অন্য হাতেদি যুৱতী গৰাকীৰ ওপৰত প্ৰেমিক ছফিকুলৰ পৰিয়ালে চলোৱা নিৰ্যাতনৰ ভিডিঅ’ ইতিমধ্যে ভাইৰেল হৈছে সৰ্বত্ৰে ৷ ইফালে যুৱতী গৰাকীৰ মৃত্যুৰ ঘটনা পিছতেই অঞ্চলজুৰি সৃষ্টি হৈছে চাঞ্চল্যৰ ।

অন্য এক খবৰৰ বাবে: 14মাহে দৰমহাৰ পৰা বঞ্চিত বদৰপুৰৰ চাফাই কৰ্মচাৰী সকল

ঘটনা সন্দৰ্ভত ইতিমধ্যে আৰক্ষীয়ে আৰম্ভ কৰিছে তদন্ত ৷ আৰক্ষীৰ তদন্তৰ অন্ততহে পোহৰলৈ আহিব প্ৰকৃততে এয়া হত্যা নে আত্মহত্যা ।