চাইকেলেৰে বিশ্বজিনাৰ হাবিয়াস এগৰাকী যুৱতীৰ

এম বি এ ডিগ্ৰীধাৰী এগৰাকী উচ্চশিক্ষিত যুৱতী ৷ অন্ধ্ৰ প্ৰদেশৰ পূব গোদাবৰী জিলাৰ বাসিন্দা এইগৰাকী যুৱতীৰ নাম হৈছে জ্যোতি ৰংগালা ৷

দৰং, 22 মেঃ ভাৰতৰ ৰাজপথ মহিলাৰ বাবে সুৰক্ষিত আৰু চাইক্লিং হৈছে শৰীৰ সুস্থ ৰখাৰ এক অন্যতম উপায় ৷ এই বাণীৰে ভাৰতবৰ্ষৰ ত্ৰিশ হাজাৰ কিলোমিটাৰ পথ পৰিভ্ৰমণ কৰি বিশ্ব অভিলেখ গঢ়াৰ লক্ষ্য এগৰাকী উচ্চশিক্ষিত যুৱতীৰ ৷

সুদূৰ অন্ধ্ৰ প্ৰদেশৰ বাসিন্দা এইগৰাকী যুৱতী হৈছে জ্যোতি ৰংগালা ৷ 2017 চনতে চাইকেল চলাই বিশ্ব অভিলেখ স্থাপনৰ লক্ষ্যৰে ঘৰৰ পৰা এই যাত্ৰা আৰম্ভ কৰে যুৱতীগৰাকীয়ে ৷ কিন্তু বিধিৰ বিপাকত পৰি দহ হাজাৰ পথ অতিক্ৰম কৰাৰ পিচতে দিল্লীত পথ দুৰ্ঘটনাত পতিত হৈ আধাতে সমাপ্ত কৰিবলগীয়া হয় এই যাত্ৰা ৷

শেহতীয়াকৈ সুস্থ হৈ উঠা জ্যোতিয়ে চলিত বৰ্ষৰ জানুৱাৰী মাহৰ পৰাই পুনৰ আৰম্ভ কৰে এই যাত্ৰা ৷ প্ৰায় সোতৰখন ৰাজ্য পৰিভ্ৰমণ কৰি যুৱতীগৰাকীয়ে অসমত উপস্থিত হৈছে ৷ ত্ৰিশ হাজাৰ কিলোমিটাৰ পথ অতিক্ৰমৰ লক্ষ্য থকা যুৱতীগৰাকীয়ে দৰং জিলাৰ খাৰুপেটীয়াত উপস্থিত হয় ৷ স্থানীয় মাৰোৱাৰী যুৱ পৰিষদে যুৱতীগৰাকীৰ থকা-খোৱাৰ ব্যৱস্থা কৰি দিয়াৰ লগতে তেজপুৰ অভিমুখী যাত্ৰাত সহায় কৰি দিয়ে ৷