শতাধিক বিপিএফ কৰ্মীৰ ইউপিপিএলত যোগদান

চিৰাঙৰ মোজাবাৰীত ইউপিপিএলৰ সদস্যভৰ্তি অভিযান ৷ ৰাইজৰ মাজত বিভিন্ন সামগ্ৰী বিতৰণৰ আশ্বাস বিটিচি প্ৰধান প্ৰমোদ বড়োৰ ৷ সভাত স্থান লাভ লাফিকুল হত্যাৰ প্ৰসংগ ৷

চিৰাং,4 ফেব্ৰুৱাৰী:চিৰাং জিলাৰ 13নং চিৰাং ব্লক কমিটিৰ উদ্যোগত বৃহস্পতিবাৰে মোজাবাৰীত অনুষ্ঠিত হয় এক সদস্যভৰ্তি সভা ৷ উক্ত সভাত ইউপিপিএল-ৰ সভাপতি তথা বিটিচি প্ৰধান প্ৰমোদ বড়োৰ উপস্থিতিত অঞ্চলটোৰ প্ৰায় 250 গৰাকী পুৰুষ-মহিলাই আনুষ্ঠানিকভাৱে দলটোত যোগদান কৰে । অঞ্চলটোৰ অৱসৰপ্ৰাপ্ত শিক্ষক ইউনুছ আলী খানৰ পৌৰহিত্যত অনুষ্ঠিত যোগদান সমাৰোহত অংশ লৈ বিটিচি প্ৰধান প্ৰমোদ বড়োৱে কয় যে, বিটিআৰত বহু সমস্যা আছে । ৰাইজৰ এই সমস্যা সমাধান কৰিবলৈ ইউপিপিএল দল আগবাঢ়ি আহিছে ৷ বড়োৱে মোজাবাৰী অঞ্চলৰ শৈক্ষিক সমস্যা দূৰ কৰাৰ প্ৰতিশ্ৰুতি প্ৰদান কৰে ৷ তদুপৰি মোজাবাৰীত নিৰ্মাণ কৰা আদৰ্শ বিদ্যালয়খন অচিৰেই মুকলি কৰা হ’ব বুলি ৰাইজৰ আগত ব্যক্ত কৰে । ইয়াৰোপৰি বিটিআৰৰ শিক্ষাৰ ক্ষেত্ৰত প্ৰয়োজনীয় সকলো প্ৰকাৰৰ ব্যৱস্থা গ্ৰহণৰ আশ্বাস প্ৰদান কৰে প্ৰমোদ বড়োৱে ৷

একেদৰে বিটিচি গঠনৰ পূৰ্বে ইউপিপিএল দলে দিয়া প্ৰতিশ্ৰুতি অনুসৰি এমাহৰ ভিতৰত বিটিআৰৰ 5,000 লোকৰ মাজত ভূমি পট্টা প্ৰদান কৰা হৈছে বুলি মত ব্যক্ত কৰে । পৰৱৰ্তী পৰ্যায়ত অসম বিধানসভা নিৰ্বাচনৰ পূৰ্বে পুনৰাই 11,000 লোকৰ মাজত ভূমি পট্টা বিতৰণ কৰা হ’ব বুলি প্ৰকাশ কৰে বড়োৱে ৷

সভাত বিটিচিৰ কাৰ্যবাহী সদস্য ৰঞ্জিত বসুমতাৰী উপস্থিত থাকি আগন্তুক বিধানসভা নিৰ্বাচনক লক্ষ্য কৰি দলীয় কামত আগবাঢ়ি যোৱাৰ কথা ব্যক্ত কৰে ৷ লগতে লাফিকুল হত্যাৰ তদন্ত অতি গোপনে চলি থকা বুলি প্ৰকাশ কৰে বসুমতাৰীয়ে । হত্যাকাৰীক চিনাক্ত কৰি কঠোৰ ব্যৱস্থা লোৱাৰ কথাও কয় ৰঞ্জিত বসুমতাৰীয়ে । উল্লেখ্য যে, দলটোত যোগদান কৰা সদস্যসকলক দলটোৰ তৰফৰ পৰা বিটিচিৰ মুখ্য কাৰ্যবাহী সদস্য প্ৰমোদ বড়ো, কাৰ্যবাহী সদস্য ৰঞ্জিত বসুমতাৰী আৰু সদস্য মাধৱ চন্দ্ৰ ছেত্ৰীয়ে গামোচাৰে আদৰণি জনায় ।

লগতে চাওকঃকোকৰাঝাৰত অবৈধ অস্ত্ৰৰ বিৰুদ্ধে আৰক্ষীৰ অভিযান