চিৰাং, 31 জুলাই :চিৰাঙত বানৰ সুযোগ গ্ৰহণ কৰি বন্য হৰিণাৰ মাংসৰ ব্যৱসায় চলাই আহিছে দুষ্ট চক্ৰই । চিৰাঙৰ পানবাৰীত আৰক্ষীয়ে অভিযান চলাই হৰিণা পশুৰ মাংসসহ দুজন লোকক গ্ৰেপ্তাৰ কৰিবলৈ সক্ষম হৈছে। প্ৰাপ্ত তথ্য অনুসৰি,মানাহ ৰাষ্ট্ৰীয় উদ্যানৰ পৰা বানৰ সময়ত ওলাই অহা হৰিণা পশু হত্যা কৰি চোৰাংভাৱে কেজিয়ে প্ৰতি এহেজাৰ টকাত বিক্ৰী কৰিছিল হৰিণাৰ মাংস।
হৰিণাৰ মাংসসহ চিৰাঙত গ্ৰেপ্তাৰ দুজন
এই তথ্য লাভ কৰিয়ে পানবাৰী থানা আৰক্ষীয়ে অভিযান চলাই হৰিণা পশুৰ মাংসসহ গ্ৰেপ্তাৰ কৰে দুজন লোকক । গ্ৰেপ্তাৰ কৰা লোক দুজন ক্ৰমে এক নং বিষ্ণুপুৰৰ ৰঞ্জন বিশ্বাস (52) আৰু এক নং দৈলংঝাৰৰ ৰমেশ মণ্ডল (50)বুলি আৰক্ষীয়ে জনায়। দুয়োজনৰ নামত বন্যপ্ৰাণী সুৰক্ষা আইনৰ অধীনত গোচৰ পঞ্জীয়ন কৰি আৰক্ষীয়ে সোধপোচ অব্যাহত ৰাখিছে । সোধপোচৰ পাচত আৰক্ষীয়ে গ্ৰেপ্তাৰ কৰা লোক দুজনক পানবাৰী বনাঞ্চলিক বিষয়াৰ হাতত গতাব বুলি জানিব পৰা গৈছে ৷