হাগ্ৰামা মহিলাৰীৰ মডেল বিটিচিৰ উন্নয়নৰ নমুনা !

চিৰাং জিলাৰ আলুখুন্দাৰ মানাহ নদীৰ পাৰা-পাৰৰ নামত যমৰ যাতনা ভূগিছে ছাত্ৰ ছাত্ৰী আৰু ৰাইজে ৷ বানপানীয়ে সাঁকো উটুৱাই নিয়াৰ দীৰ্ঘদিনৰ পিচতো জীয়াতু ভুগি আছে ৰাইজে৷ চৰকাৰ আৰু প্ৰশাসনৰ কাণসাৰ নিদিয়াৰ অভিযোগ৷ যিকোনো মুহূৰ্তত সংঘটিত হব পাৰে ভয়াবহ দুৰ্ঘটনা ৷

চিৰাং , 28 আগষ্টঃ চিৰাং জিলাৰ 33 নং বিজনী বিধান সভা সমষ্টিৰ অন্তৰ্গত আলুখুন্দাত মানাহ নদীৰ বাঢ়নী পানীয়ে বিভিন্ন ৰাস্তা ভাঙি তচনচ কৰি থৈ যোৱাৰ পিচত অঞ্চলটোৰ ৰাইজে যাতায়তৰ ক্ষেত্ৰত যমৰ যাতনা ভুগিব লগীয়া হৈছে ৷ কোকৰাঝাৰ লোক সভা সমষ্টিৰ সাংসদ নৱ শৰণীয়াৰ নিজৰ সমষ্টিৰ এনে দুৰ্দশা হোৱাৰ পাচতো কোনেও এই সন্দৰ্ভত গুৰুত্ব প্ৰদান নকৰাৰ অভিযোগ অঞ্চলবাসীৰ৷

আলুখুন্দাৰ পৰা দেওতাৰীলৈ যোৱা ৰাস্তাৰ তিনি ঠাইত বানপানীয়ে ছিঙি পেলাইছে । ইয়াৰ ভিতৰত আলুখুন্দাত নতুনকৈ হৈ থকা পকীদলঙৰ কাষৰে বনাই দিয়া বাঁহৰ সাকোখন বানপানীয়ে উটুৱাই নিয়ে । তাৰ পিচৰে পৰা নিতৌ শ শ লোকৰ লগতে বহু স্কুল-কলেজৰ ছাত্ৰ ছাত্ৰীয়ে টুলুঙা নাৱৰে বিপদসংকুল ভাৱে নৈ খন পাৰ কৰে । সেয়ে স্থানীয় ৰাইজে শীঘ্ৰে নতুন দলং নতুবা এখন সাঁকো বনাই দিবলৈ চৰকাৰক দাবী জনাইছে ৷