শিল্পী সত্বাৰে ভৰা এগৰাকী ব্যক্তি

এগৰাকী শিল্পীৰ হাতৰ পৰশত প্ৰাণ পাই উঠিছে বাঁহৰ ভিন্ন প্ৰতিমূৰ্তিয়ে ৷ শংকৰদেৱৰ পৰা আৰম্ভ কৰি ভাৰত ৰত্ন ভূপেন হাজৰিকালৈ,লতা মংগেশকাৰৰ পৰা জয়ন্ত হাজৰিকা,জুবিন গাৰ্গ,হিমন্ত বিশ্ব শৰ্মা,এপিজে আব্দুল কালামকে ধৰি এশিঙীয়া গঁড়,ধনেশ পক্ষী আদিয়েও প্ৰাণ পাই উঠিছে শিল্পী গৰাকীৰ হাতৰ পৰশত ৷

চিৰাং, 9 ছেপ্তেম্বৰ:শিল্পী সত্বাৰে ভৰা এগৰাকী ব্যক্তি ৷ যাৰ শিল্পীসুলভ মন আৰু দুহাতৰ চমৎকাৰিতাক স্তব্ধ কৰিব পৰা নাই দৰিদ্ৰতায়ো ৷ লক ডাউনৰ সময়ছোৱাত লোকগৰাকীৰ হাতৰ পৰশত প্ৰাণ পাই উঠিছে এজনৰ পাচত আনজন মহান শিল্পীৰ প্ৰতিমূৰ্তিয়ে ৷ বাঁহেৰে কেইবাগৰাকীও শিল্পীৰ প্ৰতিমূৰ্তিকে ধৰি চৰাই-চিৰিকতি,জীৱ-জন্তু আদি সাজি উলিওৱা লোকগৰাকীৰ নাম নবীন চন্দ্ৰ বৰ্মন ৷ চিৰাং জিলাৰ অন্তৰ্গত চিদলী ধলাগাঁৱৰ ৰাজাজানৰ বাসিন্দা শিল্পী গৰাকী ৷

শংকৰদেৱৰ পৰা আৰম্ভ কৰি ভাৰত ৰত্ন ভূপেন হাজৰিকালৈ,লতা মংগেশকাৰৰ পৰা জয়ন্ত হাজৰিকা,জুবিন গাৰ্গ,হিমন্ত বিশ্ব শৰ্মা,এপিজে আব্দুল কালামকে ধৰি এশিঙীয়া গঁড়, ধনেশ পক্ষী আদিয়েও প্ৰাণ পাই উঠিছে শিল্পী গৰাকীৰ হাতৰ পৰশত ৷ বাঁহেৰে এনেবোৰ সামগ্ৰী সজা শিল্পীগৰাকীয়ে দিনৰ ভাগত বঙাইগাঁও শোধনাগাৰত ৰং কৰা কৰ্মী হিচাপে কৰি আহিছে কাম ৷ কামৰ পৰা উভতিয়েই লাগি যায় বিমূৰ্ত বাঁহ এটুকুৰাক মূৰ্ত কৰি তোলাৰ কামত ৷ প্ৰথমাৱস্থাত লোকগৰাকীয়ে ঘৰৰ সৌন্দৰ্য বৰ্ধনৰ বাবে এই সামগ্ৰী সমূহ সাজি উলিয়াইছিল যদিও আৰ্থিক দীনতাৰ বাবে সম্প্ৰতি তেওঁ সেই সামগ্ৰীসমূহ উচিত মূল্যত বিক্ৰী কৰিবলৈয়ো প্ৰস্তুত ৷

লোকগৰাকীৰ হাতৰ পৰশত প্ৰাণ পাই উঠিছে এজনৰ পাচত আনজন মহান শিল্পীৰ প্ৰতিমূৰ্তিয়ে

কেৱল দিন হাজিৰাৰে পৰিয়াল পোহপাল দিয়া ব্যক্তিগৰাকীয়ে সম্প্ৰতি সন্মুখীন হৈছে যথেষ্ট অসুবিধাৰ ৷ কিয়নো আৰ্থিক দীনতাই জুৰুলা কৰিছে পেলাইছে এইগৰাকী শিল্পীক ৷ যাৰ বাবে লোকগৰাকীৰ শিল্পকৰ্মক প্ৰশংসাৰে উপচাই পেলোৱা স্থানীয় লোকেও সম্প্ৰতি তেওঁৰ বাবে চৰকাৰক অলপ সহায়ৰ হাত আগবঢ়াবলৈ জনাইছে অনুৰোধ ৷ চৰকাৰৰ এধানি সঁহাৰিয়ে হয়তো আগন্তুক দিনত এনেদৰেই শিল্পকৰ্ম অব্যাহত ৰাখি, শিল্পীগৰাকীয়ে সুনাম কঢ়িয়াই আনিবলৈ সক্ষম হ'ব বৃহত্তৰ অঞ্চলটোলৈ ৷

শিল্পী সত্বাৰে ভৰা এগৰাকী ব্যক্তি

লগতে পঢ়ক:জন্মাষ্টমী উপলক্ষে শতকোটি নমন ত্ৰি-জগতৰ পতিগৰাকীলৈ