চিৰাং, 13 এপ্ৰিলঃচিৰাং সংমণ্ডল বন বিষয়া ব্ৰহ্মানন্দ পাতিৰীয়ে জনিবলৈ দিয়া অনুসৰি, লক ডাউনৰ সময়ত জিলাখনৰ বনাঞ্চল সমূহত চোৰাং চিকাৰী আৰু চোৰাং কাঠ মাফিয়াই গছ কাটি তহিলং কৰাৰ লগতে বন্যপ্ৰাণী চিকাৰ কৰিছে । বন বিভাগৰ লোকে এছএছবিৰ সহযোগত বনাঞ্চলত চোৰাং চিকাৰীৰ প্ৰৱেশৰ তথ্য লাভ কৰাৰ পিচতে, আমটেকা বনাঞ্চলত এক অভিযান চলাইছিল । এই অভিযানত দেওবাৰে বিয়লি বন বিভাগ লগত চোৰাং চিকাৰীৰ গুলীয়াগুলী চলে বুলিও জনায় বন বিষয়া গৰাকীয়ে ।
দেওবাৰে নিশা কুকলুঙৰ বন বিষয়া অবিনাশ বসুমতাৰীৰ নেতৃত্বত চলোৱা অভিযানত এটা মৃত হৰিণাৰ সৈতে এজন অভিযুক্ত চোৰাং চিকাৰী গ্ৰেপ্তাৰ কৰিবলৈ সক্ষম হয় । গ্ৰেপ্তাৰ হোৱা লোকজন মখনাগুৰি গাঁৱৰ ৰাজকু মুৰ্মু (৩৫) বুলি জনায় ব্ৰহ্মানন্দ পাতিৰীয়ে । উল্লেখ্য যে, লোকজনৰ লগতে 22 খন চাইকেল, 10 খন ধনু আৰু ১৮ ডাল কাড় জব্দ কৰিছে বন বিভাগৰ লোকে । ইতিমধ্যে লোকজনক আদালতত হাজিৰ কৰাই ন্যায়িক জিম্মালৈ প্ৰেৰণ কৰা হৈছে । উল্লেখ্য যে, বৰ্তমানেও আমটেকা আৰু কুকলুং বনাঞ্চলত চোৰাং চিকাৰীৰ বিৰুদ্ধে অব্যাহত আছে অভিযান ।
লগতে পঢ়কঃকাজিৰঙা ৰাষ্ট্ৰীয় উদ্যানত চোৰাং চিকাৰীৰ গুলীত আহত বনকৰ্মী
