চিৰাং, 8 মে': দুপাত টিনৰ এটা জৰাজীৰ্ণ ঘৰ ৷ তাৰ তলতেই দুৰ্বিসহ জীৱন যাপন এজন বৃদ্ধৰ ৷ পৈত্ৰিক ভূমি আছে যদিও অৱহেলিত নিজ ভাতৃৰ দ্বাৰাই ৷ চিৰাং জিলাৰ বাসুগাঁও থানাৰ অন্তৰ্গত, গোগলাপাৰা আৰু ভদেয়াগুৰি সীমান্তৰ বাসিন্দা বৃদ্ধজনৰ নাম ধৰণী বৰ্মন ৷ এবছৰ পূৰ্বে 60ৰ উৰ্ধৰ লোকজন এক দুৰ্ঘটনাত পতিত হৈ, ভৰি ভগাৰ পিচৰ পৰাই অৱহেলিত হৈ পৰি আছে ভগা টিনৰ চালিৰ তলতেই ৷ পিতৃৰ জেষ্ঠ পুত্ৰ হোৱা সত্বেও 5 ভাতৃয়ে পৈত্ৰিক সম্পত্তি দখল কৰি, তেওঁক এনেদৰেই এৰি দিলে এটা দুৰ্বিসহ জীৱনৰ দিশে ৷
দুৰ্ভগীয়া লোকজন ভায়েক সকলৰ আশাতে ৰৈ আছে যদিও, ভায়েক সকলেও দুপাত টিনেৰে এখন চালি দিয়েই সামৰিলে দ্বায়িত্ব ৷ যাৰ বাবে ৰ'দ, বৰষুণ, বতাহকো নেওচি এক অসহায় জীৱন কটাবলগীয়া হৈছে লোকজনে ৷ কোনোৱে সহায় কৰিলে খায়, নকৰিলে লঘোণে-ভোকেই পৰি ৰয় চালিখনৰ তলতেই ৷ চালিখনৰ তলতেই শুইছে, খাইছে আৰু শৌচ-প্ৰস্ৰাৱো কৰিছে সেইখন চালিৰ তলতেই ৷