চিৰাং, 24 ছেপ্টেম্বৰঃ চিৰাং জিলাৰ পানবাৰী থানাৰ অন্তৰ্গত গাভৰু খুন্তাত সেনা-আৰক্ষী আৰু এচএচবিৰ যুটীয়া অভিযানত বৃহৎ সাফল্য ৷ পুতি থোৱা অৱস্থাত উদ্ধাৰ এন ডি এফ বি (ছা) ৰ বৃহৎ অস্ত্ৰ ভাণ্ডাৰ । মঙলবাৰে জিলাখনৰ গাভৰুখুন্দাৰ সংৰক্ষিত বনাঞ্চলত পুতি থোৱা এই বৃহৎ সংখ্যক অস্ত্ৰ ভাণ্ডাৰ জব্দ কৰা হয় ৷
চিৰাং জিলাৰ বিজনী মহকুমা আৰক্ষী বিষয়া প্ৰকাশ মেধিৰ নেতৃত্বত চলা যৌথ অভিযানত ভাৰতীয় সেনাৰ ৰেড হৰ্ণ ডিভিজনৰ পঞ্চম গাৰৱাল ৰাইফল আৰু এচ এচ বিৰ 54 নম্বৰ বেটেলিয়নৰ জোৱান সকলে ধাৰাবাহিক ভাৱে সোমবাৰে আবেলি ৫ বজাৰ পৰাই যৌথ অভিযান চলায় ৷
পানবাৰী থানাৰ পৰা 18 কি:মি: উত্তৰে মানাহ ৰাষ্ট্ৰীয় উদ্যানৰ ভিতৰত পানবাৰী সংৰক্ষিত বনাঞ্চলৰ গাভৰুখুন্দাত বিশেষ তথ্যৰ ভিত্তিত চলোৱা এই অভিযানত সেনাৰ তদন্তকাৰী কুকুৰৰ সহায়ত বহু ঠাইত গাত খান্দি মঙলবাৰে পুৱতি নিশা প্ৰায় 5.30 মান বজাত মুঠ 8 টা পুতি থোৱা পেকেট সমুহ উদ্ধাৰ কৰিবলৈ সক্ষম হয় ।