ৰাইজক দেখুৱাবলৈহে দালাল চক্ৰৰ বিৰুদ্ধে অভিযান চলাইছে চৰকাৰে: লুৰিণ

‘‘মুখ্যমন্ত্ৰীয়ে খিলঞ্জীয়াৰ ভূমিৰ অধিকাৰ খিলঞ্জিয়াৰ হাতত দিয়াত ব্যৰ্থ হয় ৷ সেয়েহে ৰাইজক দেখুৱাবলৈহে দাদালৰাজৰ বিৰুদ্ধে অভিযান হাতত লৈছে’’ । মঙলবাৰে সন্ধিয়া চাপাগুৰিস্থিত প্ৰাক্তন মন্ত্ৰী চন্দন ব্ৰহ্ম(Chandan Brahma)ৰ বাসগৃহত উপস্থিত হৈ সংবাদ মাধ্যমৰ আগত এই মন্তব্য় কৰে অসম জাতীয় পৰিষদ(AJP)ৰ সভাপতি লুৰিণজ্যোতি গগৈ(Lurinjyoti Gogoi)য়ে ৷

চিৰাং, 22 ছেপ্তেম্বৰ : চিৰাঙৰ চাপাগুৰিস্থিত প্ৰাক্তন মন্ত্ৰী চন্দন ব্ৰহ্ম(Chandan Brahma)ৰ বাসগৃহত সদল-বলে উপস্থিত অসম জাতীয় পৰিষদ(AJP)ৰ সভাপতি লুৰিণজ্যোতি গগৈ(Lurinjyoti Gogoi) ৷ মঙলবাৰে সন্ধিয়া মন্ত্ৰীগৰাকীৰ বাসগৃহত হঠাতে উপস্থিত হয় লুৰিণজ্যোতি গগৈ ৷ প্ৰাক্তন মন্ত্ৰীগৰাকীৰ বাসগৃহত উপস্থিত হৈ ভাতৃ জনাৰ্ধন ব্ৰহ্মৰ মৃত্যুৰ বাবে শোকসন্তপ্ত পৰিয়ালক সমবেদনা জনায় লুৰিণে ৷

ইয়াৰ বাহিৰে কোনো ৰাজনৈতিক উদ্দেশ্য লৈ প্ৰাক্তন মন্ত্ৰীগৰাকীৰ বাসগৃহত অহা নাই বুলি সংবাদ মাধ্যমৰ আগত সদৰী কৰে অসম জাতীয় পৰিষদ(AJP)ৰ সভাপতিগৰাকীয়ে । ইফালে মাটিৰ দালাল চক্ৰৰ বিৰুদ্ধে আৰক্ষীয়ে চলোৱা অভিযান সন্দৰ্ভত লুৰিণজ্যোতি গগৈয়ে কয় যে, খিলঞ্জীয়াৰ ভূমিৰ অধিকাৰ খিলঞ্জিয়াৰ হাতত দিয়াত ব্যৰ্থ হৈছে মুখ্যমন্ত্ৰী ৷ সেয়েহে ৰাইজক দেখুৱাবলৈহে মুখ্যমন্ত্ৰীয়ে এনেধৰণৰ কাৰ্যকলাপ হাতত লৈছে ।

তেওঁ লগতে কয় যে, নিৰ্বাচনৰ পূৰ্বে সত্ৰ, ট্ৰাইবেল বেল্টব্লক, বনাঞ্চল আদিৰ ভূমি বেদখল মুক্ত কৰাৰ প্ৰতিশ্ৰুতি দিছিল যদিও সেই প্ৰতিশ্ৰুতি পূৰণ কৰিব পৰা নাই শাসকীয়া চৰকাৰখনে ৷ বিজেপিক পৰাভূত কৰিবলৈ সকলো বিৰোধী দল একত্ৰিত হৈ উপ নিৰ্বাচনৰ বাবে প্ৰতিটো সমষ্টিতে এজনকৈ প্ৰাৰ্থী দিয়াৰ চিন্তা-চৰ্চা কৰা হৈছে যদিও এআইইউডিএফ(AIUDF) দলক আওপকীয়াকৈ সাম্প্ৰদায়িক বুলি কৈ নিজ স্থিতি স্পষ্ট কৰে লুৰিণে । লগতে তেওঁ বৃহৎ দল হিচাপে কংগ্ৰেছক এই ক্ষেত্ৰতত আগভাগ লোৱাৰ বাবেও আহ্বান জনায় ৷

লগতে পঢ়ক :থানালৈ আহি অসুস্থ হৈ পৰিল তৃণমূল কংগ্ৰেছৰ নেতা কুনাল ঘোষ

আনহাতে, মুখ্যমন্ত্ৰীৰ নিৰ্দেশত ৰাজ্যজুৰি চলা এনকাউণ্টাৰ(Encounter) সন্দৰ্ভত লুৰিণে কয় যে, আইন-আদালত থকাৰ পাচতো আৰক্ষীয়ে প্ৰকৃত অপৰাধী চিনাক্ত নকৰি অবৈধভাৱে এনকাউন্টাৰ কৰি আছে । পূৰ্বতে আৰক্ষীৰ হাতৰ পৰা কোনো অপৰাধী পলোৱা নাছিল কিন্ত এতিয়া পলাবলৈ লৈছে ।

আৰক্ষী বিভাগটো অধপতনে গ’ল নেকি বুলিও প্ৰশ্ন উত্থাপন কৰে এজেপিৰ সভাপতি গগৈয়ে । তেওঁ কয় যে, এয়া কেতিয়াও আইনৰ শাসন হ’ব নোৱাৰে ৷ য’ত ন্যায়পালিকাই বিচাৰ কৰে, কিন্তু ইয়াত ব্যাতিক্ৰম দৃশ্যহে পৰিলক্ষিত হৈছে । এনকাউন্টাৰসমূহক পৰিকল্পিত আখ্যা লুৰিণৰ ৷

ইয়াৰ লগতে লুৰিণজ্যোতি গগৈয়ে কোকৰাঝাৰৰ এনকাউণ্টাৰৰ ন্যায়িক তদন্তৰ দাবী জনায় ৷ এনে কাৰ্যই জংঘল ৰাজ বা নিজৰ ইচ্ছানুসৰি আইনৰ বিৰুদ্ধে কৰা কামক প্ৰতিফলিত কৰে বুলিও অভিযোগ কৰে লুৰিণে । গতিকে এনেধৰণৰ ঘটনাৰ বিৰুদ্ধে সদায় মাত মাতি যোৱাৰ হুংকাৰ দিয়ে এজেপিৰ সভাপতিগৰাকীয়ে ৷

লগতে পঢ়ক:বকলীয়াঘাটত জ্বলিল মুখ্যমন্ত্ৰীৰ প্ৰতিমূৰ্তি