বিজনীত আৰক্ষীৰ অভিযানত বুজন পৰিমানৰ হেৰ'ইন জব্দ

চিৰাং জিলাৰ বিজনীৰ কাৱাটিকা চাৰিআলিৰ পৰা বৃহৎ পৰিমানৰ হেৰ'ইন সহ এজনক আটক ৷ আৰক্ষীৰ তদন্ত অব্যাহত ৷

চিৰাং, 5 জুলাই : ৰাজ্যত অব্যাহত থকা ক'ভিড ভয়াৱহতাৰ মাজতে ৰাজ্যত বৃদ্ধি পাইছে ড্ৰাগছ সৰৱৰাহৰ লগতে বিভিন্ন অপৰাধজনিত ঘটনা ৷ শেহতীয়াকৈ ৰাজ্যজুৰি চলা আৰক্ষীৰ ড্ৰাগছ বিৰোধী অভিযানত ৰাজ্যৰ বিভিন্ন প্ৰান্তৰ পৰা উদ্ধাৰ হৈছিল বুজন পৰিমানৰ নিষিদ্ধ ড্ৰাগছ ৷ ইয়াৰ মাজতে চিৰাং জিলাৰ বিজনীৰ কাৱাটিকা চাৰিআলিত সোমবাৰে চিৰাং আৰক্ষীয়ে চলোৱা অভিযানত 30 লক্ষাধিক টকাৰ হেৰ'ইনসহ গ্ৰেপ্তাৰ হয় এজন সৰবৰাহকাৰী ৷ সৰৱৰাহকাৰীটোৰ নাম মাকমাদল হাছান বুলি প্ৰকাশ কৰিছে আৰক্ষীয়ে ৷

উল্লেখ্য যে, আৰক্ষীৰ অভিযানত কাৱাটিকা চাৰিআলিত থকা গণি এন্টাৰপ্ৰাইজ নামৰ ষ্টেচনাৰী আৰু গেলামাল দোকান খনৰ পৰা জব্দ কৰা হয় 2 টাকৈ হেৰ'ইনৰ পেকেট ৷ জব্দকৃত হেৰ'ইনখিনিৰ ওজন 141 গ্ৰাম বুলি প্ৰকাশ কৰিছে আৰক্ষীয়ে ৷ লগতে দোকানখনৰ স্বত্বাধিকাৰী তথা ড্ৰাগছ সৰবৰাহকাৰী মাকমাদল হাছান (২৫) ক গ্ৰেপ্তাৰ কৰিছে চিৰাং আৰক্ষীয়ে৷ ধৃত সৰবৰাহকাৰীটোৰ ঘৰ বঙাইগাঁও জিলাৰ গৰাইমাৰীত বুলি জানিব পৰা গৈছে ।

এক গোপন খবৰৰ ভিত্তিত চিৰাঙৰ আৰক্ষী অধীক্ষক গৌৰৱ উপাধ্যায়ৰ নেতৃত্বত আৰক্ষীৰ এটি দলে অভিযান চলাই দোকান খনৰ পৰা হেৰ'ইনসহ সৰবৰাহকাৰী মাকমাদল হাছানক গ্ৰেপ্তাৰ কৰে ৷ জিলা আৰক্ষী অধীক্ষক গৌৰৱ উপাধ্যায়ে কয় যে, ড্ৰাগছৰ বিৰুদ্ধে আৰক্ষীৰ অভিযান চলিছে আৰু চলিব৷ লগতে ড্ৰাগছৰ সৈতে জড়িত সকলো অপৰাধীক চিনাক্ত কৰিবলৈ তদন্ত কৰি থকা হৈছে বুলি জনাইছে অধীক্ষক গৰাকীয়ে ৷ চিৰাঙৰ ভিতৰত বিজনীৰ কাৱাটিকাত অধিক ড্ৰাগছ আসক্ত আৰু ড্ৰাগছ বিক্ৰেতা পোৱাৰ কথাও সদৰি কৰে আৰক্ষী অধীক্ষক জনে ৷

লগতে পঢ়কঃনলবাৰীত নীলা কেৰাচিনৰ ক’লা বেহাৰ আঁৰত কোন ?