চিৰাঙতো জ্বলিল মুখ্যমন্ত্ৰী আৰু শিক্ষামন্ত্ৰীৰ প্ৰতিকৃতি

চিৰাঙত মুখ্যমন্ত্ৰী আৰু শিক্ষা মন্ত্ৰীৰ প্ৰতিমুৰ্তি দাহ কৰি এবিএমছুৰ প্ৰতিবাদ । মধ্যাহ্ন ভোজন বেচৰকাৰী সন্থাক দিয়াৰ প্ৰতিবাদত চিৰাং জিলা এবিআমছুৱে এই প্ৰতিবাদী কাৰ্যসূচী ৰূপায়ন কৰে ।

চিৰাঙ, 3 নবেম্বৰ: দেওবাৰে চিৰাং জিলাৰ পদ্মপুৰত জিলা এ বি এম ছুৱে মধ্যাহ্ন ভোজনৰ দ্বায়িত্ব ব্যক্তিগত প্ৰতিষ্ঠানক অৰ্পন কৰাৰ প্ৰতিবাদত ৰাজপথত অসমৰ মুখ্যমন্ত্ৰী সৰ্বানন্দ সোণোৱাল আৰু শিক্ষামন্ত্ৰী সিদ্ধাৰ্থ ভটাৰ্চাযৰ প্ৰতিমূৰ্তি দাহ কৰি প্ৰতিবাদ সাব্যস্ত কৰে । চৰকাৰৰ এনে পদক্ষেপক সংগঠনটোৱে কঠোৰ ভাৱে সমালোচনা কৰি ক্ষোভ প্ৰকাশ কৰে ।

প্ৰতিবাদকাৰী সকলে এই সন্দৰ্ভত অভিযোগ উত্থাপন কৰি কয় যে, বিগত ১৫ বছৰে সামান্য পাৰিশ্ৰমিকৰে কামকৰি আহিছে মধ্যাহ্ন ভোজনৰ কৰ্মী সকলে ৷ কিন্তু ইমানৰ পিচতো ভালদৰেই নিজৰ দ্বায়িত্ব দম্পাদন কৰি অহা এই ৰান্ধনী সকলক কামৰ পৰা চৰকাৰে বঞ্চিত কৰি বেচৰকাৰী সংস্থাক গতাই দিলে । বেচৰকাৰী সংস্থাই যোগান ধৰা মধ্যাহ্ন ভোজনৰ খাদ্য অতিকে নিম্ন মানৰ হোৱা হেতুকে খাব নোৱাৰি ছাত্ৰ-ছাত্ৰী সকলে নলাত পেলাবলগীয়া হৈছে । এবিএমছুৱে এই ঘটনা সহজভাৱে গ্ৰহন কৰিব পৰা নাই । গতিকে অতি শীঘ্ৰেই চৰকাৰে তথা শিক্ষা বিভাগে পূৰ্বৰ দৰেই মধ্যাহ্ন ভোজন কৰ্মীৰ হাতত মধ্যাহ্ন ভোজনৰ দ্বায়িত্ব গতাই ছাত্ৰ-ছাত্ৰীক খোৱাৰ উপযোগী মধ্যাহ্ন ভোজন যোগন ধৰাৰ ব্যৱস্থা কৰাৰ দাবী জনাইছে ।

অসম চৰকাৰৰ এনে হঠকাৰী সিদ্ধান্তক প্ৰত্যাহাৰ জনাই পূৰ্বৰ নীতিৰে অৰ্থাৎ বিদ্যালয়তে মধ্যাহ্ন ভোজন প্ৰস্তুত কৰি প্ৰদান কৰিব লাগে বুলি চৰকাৰৰ ওচৰত দাবী জনাইছে ছাত্ৰ সংগঠনটোৱে ।