চিৰাঙত লক্ষী পুজা মেলাৰ নামত চলিছে জুৱা খেলৰ বৃহৎ বজাৰ

চিৰাং জিলাৰ বিভিন্ন ঠাইত লক্ষী পূজাৰ আনন্দৰ সুযোগ লৈ পূজাৰ মেলাৰ নামত একাংশই চলাই আছে জুৱা খেলৰ বৃহৎ ব্য়ৱসায়

চিৰাং,17 অক্টোবৰ : চিৰাং জিলাৰ বিভিন্ন ঠাইত লক্ষী পূজাৰ মেলাৰ নামত চলিছে অবাধ জুৱা । মুকলি ভাৱে চলি থকা জুৱা দেখিও নেদেখাৰ ভাও প্ৰশাসনৰ । জিলাখনৰ পানবাৰী থানাৰ অন্তৰ্গত মোনাকোচাত লক্ষী পূজাৰ আনন্দৰ সুযোগ লৈ চলাই আছে একাংশই মুকলি ভাৱে জুৱা । জুৱা খেল চলাই থকা এই লোকসকলে নিজৰ মুনাফা আদায়ৰ বাবে ছাত্ৰ সমাজ ধবংশ কৰাৰ অকনো কুন্ঠাবোধ নকৰে । জিলাখনত এবছুকে আদি কৰি বিভিন্ন ছাত্ৰ সংগঠনৰ বিৰোধিতাৰ পিচতো জুৱাৰী সকলে এই দৰেই পূজাৰ নামত অনুষ্ঠিত মেলাত মুকলিভাৱে জুৱা চলাই থকা পৰিলক্ষিত হৈছে । জুৱাৰ বৃহৎ বজাৰখনত প্ৰতিনিশাই কেইবা লাখ টকা বিনিয়োগ হোৱা অভিযোগ উত্থাপিত হৈছে । একাংশ বিষয়া-কৰ্মচাৰীৰ আশীৰ্বাদত জুবাৰী সকলে এই দৰেই চলাই গৈছে নিজৰ ব্যৱসায় । অতি সোনকালে ইয়াৰ ওপৰত ব্যবস্থা গ্ৰহণ কৰিবলৈ দাবী জনাইছে স্থানীয় ৰাইজে ।

ইফালে জিলাখনৰ ঢালিগাঁও থানাৰ অন্তৰ্গত গৌজোনপুৰিৰ শনি মন্দিৰৰ ওচৰতে নিতৌ অনুষ্টিত হয় জুৱা । ঝাণ্ডী মুণ্ডাৰ এই খেল একাংশ বিদ্ৰোহী সংগঠনৰ সদস্যই চলোৱাৰ অভিযোগ উত্থাপন হৈ আহিছে । আৰক্ষী প্ৰশাসনৰ লোকে জনাৰ পিচতো কোনো ব্যৱস্থা গ্ৰহণ কৰা নাই । আচৰ্যজনক যে বঙাইগাঁও আৰক্ষী ছাউনীৰ নিচেই কাষতে থকা এই জুৱা স্থানত সদায় জুৱা চলে কিন্ত তাৰ পাছতো নিৰৱ দৰ্শকৰ ভূমিকা পালন কৰি আহিছে ।