চিৰাং,29ছেপ্টেম্বৰঃ "অবড়ো আমাৰ কাৰণে কোনো ফেক্টৰ নহয় । গতিকে কোনে কি কয় কওক মুঠতে বিটিচিত আমিয়েই জিকিম ৷ আমাক কোনেও একো কৰিব নোৱাৰে ৷"-দেওবাৰে এখন দলীয়া সভাত এই মন্তব্য বিটিচি প্ৰধান হাগ্ৰামা মহিলাৰীৰ ৷
ৰাজ্যত 4 সমষ্টিৰ উপনিৰ্বাচনৰ সমান্তৰালকৈ বিটিচিৰ পৰিষদীয় নিৰ্বাচনো সমাগত । যাৰ বাবে ৰাজনৈতিক তৎপৰতা বাঢ়িছে সকলো দল-সংগঠনৰ । দেওবাৰে চিৰাঙৰ বিজনীত বিজনী জিলা বিপিএফৰ দলীয় সভাত অংশগ্ৰহণ কৰি হাগ্ৰামা মহিলাৰীয়ে কয় যে আগন্তক বিটিচি নিৰ্বাচনত বিপিএফ দলৰেই বিজয় নিশ্চিত ৷ মাথো বিপিএফৰ সকলো কৰ্মকৰ্তাৰ সক্ৰিয় অংশগ্ৰহণৰ প্ৰয়োজন বুলি সভাত মহিলাৰীয়ে মন্তব্য কৰে । ইপিনে অবড়ো নেতা তথা সাংসদ শৰণীয়াই কোৱাৰ দৰে বিটিচিৰ পৰা কোনো গাঁও কৰ্তন নহয় বুলিও জনায় হাগ্ৰামা মহিলাৰীয়ে । বৰঞ্চ ৯৫ খন গাঁও বিটিচিত সোমাবহে বুলি জনায় হাগ্ৰামাই । তেওঁ লগতে কয় যে ইউ পি পিএল আৰু এৱছুৰ লগত তেওলোকৰ কোনো আলোচনা চূড়ান্ত হোৱা নাই । দেওবাৰে বিজনী বিপিএফৰ এই দলীয় সভাত বিটিচি প্ৰধান হাগ্ৰামা মহিলাৰীৰ লগতে বিজনী সমষ্টিৰ বিধায়ক কমল সিং নাৰ্জাৰী আৰু এম চি এল এ সকলৰ লগতে কেবাশ দলীয় কৰ্মকৰ্তা উপস্থিত থাকে ।