চিৰাং, ১১ মে': সমাগত বাৰিষা । যাৰ বাবে তৎপৰ হৈ পৰিছে ৰাজ্য চৰকাৰ । সেয়হে অসম চৰকাৰৰ নিৰ্দেশনা অনুসৰি সোমবাৰে বান নিয়ন্ত্ৰন সন্দৰ্ভত চিৰাং জিলা প্ৰশাসনৰ সৈতে মিলিত হয় মন্ত্ৰী চন্দন ব্ৰহ্ম । চিৰাং জিলা উপায়ুক্তৰ কাৰ্যালয়ত জিলা প্ৰশাসনৰ সৈতে মিলিত হৈ বান পৰিস্থিতি সন্দৰ্ভত বুজ লয় মন্ত্ৰী গৰাকীয়ে ।
আনহাতে, সভাত মন্ত্ৰী গৰাকীয়ে দুৰ্যোগ প্ৰশমন বিভাগৰ সৈতে মিলিত হোৱাৰ লগতে জিলাখনৰ সকলো বিভাগৰ সৈতে মত বিনিময়ত ক্ৰমে জিলা খনৰ বান্ধ, মথাউৰি, ইত্যাদিৰ লগতে বান প্ৰতিৰোধ সন্দৰ্ভত আলোচনা কৰে ।
চিৰাং জিলা উপায়ুক্ত গৌতম তালুকদাৰৰ সভাপতিত্বত অনুষ্ঠিত সভাত মন্ত্ৰী চন্দন ব্ৰহ্ম, বিজনী সমষ্টিৰ বিধায়ক কমল সিং নাৰ্জাৰীকে আদি কৰি জিলাখনৰ বিভিন্ন বিভাগৰ মুৰব্বী সকল উপস্থিত থাকে । মন্ত্ৰী চন্দন ব্ৰহ্মই সভাত আগন্তক বাৰিষাত বানপানীৰ মুখামুখি হ'ব পৰাকৈ সকলো ফালৰ পৰা প্ৰস্তুত হোৱাৰ বাবে জিলা প্ৰশাসনক আহ্বান জনায় ।
লক ডাউন সফলভাৱে তথা লক ডাউনৰ সকলো নিয়ম মানিবলৈয়ো আহ্বান জনায় মন্ত্ৰী চন্দন ব্ৰহ্মই । জিলাখনৰ শিক্ষা বিষয়া সকলক আধুনিক বিজ্ঞান প্ৰযুক্তিৰ জৰিয়তে পাঠদান অব্যাহত ৰাখিবলৈ পৰামৰ্শ দিয়ে । সভাত জিলা উপায়ুক্তই জিলাখনক সকলো ধৰনৰ বিপদৰ পৰা ৰক্ষা কৰাৰ বাবে সকলো বিভাগ তথা বিষয়া সকলৰ সহযোগিতা বিচাৰে ।
