বড়ো চুক্তি ৰূপায়নৰ বিজয় উৎসৱ

চিৰাং জিলাসদৰ কাজলগাঁৱস্থিত পথাৰত বড়ো চুক্তি ৰূপায়নৰ বিজয় উৎসৱ ৷ চুক্তি স্বাক্ষৰকাৰী এবছুৰ সভাপতি প্ৰমোদ বড়ো,সম্পাদক লৰেঞ্চ ইচলাৰী আৰু এনডিএফবি(প্ৰ)ৰ সভাপতি গোবিন্দ বসুমতাৰীক ৰাজহুৱা সম্বৰ্ধনা । লক্ষাধিক লোকৰ সমাগম ।

চিৰাং,28 জানুৱাৰীঃ চিৰাং জিলা সদৰ কাজলগাঁও পথাৰত আজি বড়ো চুক্তিৰ বিজয় উৎসৱ৷ লক্ষাধিক লোকৰ সমাগম ৷ নতুন দিল্লীত কেন্দ্ৰীয় চৰকাৰ, ৰাজ্য চৰকাৰৰ সৈতে এবছু আৰু এনডিএফবিৰ চাৰিওটা গোটৰ ত্ৰিপাক্ষিক চুক্তিৰ পিচত পোনে পোনে চিৰাং জিলা সদৰ কাজলগাঁও আহি উপস্থিত হয় চুক্তি স্বাক্ষৰ কৰা একাংশ নেতা ৷

তৃতীয় বড়ো চুক্তিত স্বাক্ষৰ কৰা তিনিগৰাকী নেতা ক্ৰমে এবছুৰ সভাপতি প্ৰমোদ বড়ো, সম্পাদক লৰেঞ্চ ইচলাৰী আৰু এনডিএফবি(প্ৰ)ৰ সভাপতি গোবিন্দ বসুমতাৰীক বিপুল ভাৱে বাদ্য আৰু নৃত্যৰে সম্বৰ্ধনা জনায় উপস্থিত লোকসকলে ৷ অৱশ্যে চুক্তি স্বাক্ষৰ কৰা এন ডি এফ বি(ছা)ৰ নেতা সকলে এতিয়াও দিল্লী এৰিব পৰা নাই ৷ বিটিচিৰ মুখ্য হাগ্ৰামা মহিলাৰীও চিৰাঙত এবছুৰ উদ্যোগত আয়োজিত এই অনুষ্ঠানত উপস্থিত থাকিব নোৱাৰিলে ৷

সম্বৰ্ধনা সভাত উদাত্ত কন্ঠে এবছুৰ সভাপতিৰ ভাষণ ৷ সকলো জাতি জনগোষ্ঠীৰ লোকক বি টি আৰৰ উন্নয়নৰ কামত সহযোগিতা আগবঢ়োৱাৰ আহ্বান জনায় এবছুৰ নেতৃত্বই ৷ এই বি টি আৰ চুক্তি কেৱল বড়ো সকলৰ বাবেই নহয় সকলো লোকৰ বাবেই হৈছে বুলি উল্লেখ কৰে ৷

সভাত এনডিএফবি(প্ৰ)ৰ নেতা গোবিন্দ বসুমতাৰীয়েও উদাত্ত কন্ঠে ভাষণ দি কয় যে, দীৰ্ঘদিনীয়া আন্দোলনৰ পিচত আজি এই চুক্তি হৈছে উন্নয়ন আৰু শান্তিৰ বাবে ৷ সভাত ইউপিপি এলৰ সভাপতি উৰ্খাউ গৌৰা ব্ৰহ্মই ভাষণত কয় যে, এতিয়াৰে পৰা সকলো জাতি জনগোষ্ঠীৰ সম অধিকাৰ সম উন্নয়নৰ বাবে কাম কৰিব ৷