চিৰাং, ২০ মে' : সাম্প্ৰতিক সময়ত কৰ'ণা মহামাৰীৰ ভয়াৱহ পৰিস্থিতিৰ মাজতে চিৰাং জিলাৰ বাসুগাঁৱত জিলাখনৰ ভিতৰতে সৰ্বাধিক লোক আক্ৰান্ত হয় । গাঁওখনত শেহতীয়াকৈ কৰ'ণাৰ সংক্ৰমণ ব্যাপক ৰূপত বৃদ্ধি পোৱাত উদ্বিগ্ন হৈ পৰিছে গাঁওবাসী । চাৰিটা ৱাৰ্ডযুক্ত চহৰখনত যাতে পুনৰাই ক'ভিড-১৯ ৰ সংক্ৰমণ বৃদ্ধি নাপায় তাৰ বাবে ৰাইজৰ লগতে সংগঠন আৰু ব্যৱসায়ীসকলে চহৰখনত সম্পূৰ্ণ লক ডাউন জাৰি কৰাৰ সিদ্ধান্ত গ্ৰহণ কৰিছে ৷
জনসাধাৰণৰ স্বাস্থ্যৰ সজাগতা আৰু ভয়াৱহ সংক্ৰমণ ৰোধৰ বাবে ৰাইজৰ স্বাৰ্থত ছাত্ৰ সংগঠন এবছু, আক্ৰাছু, সদৌ অসম বঙালী যুৱ ছাত্ৰ ফেডাৰেচন, সদৌ বি টি আৰ বঙালী যুৱ ছাত্ৰ ফেডাৰেচন, আমছু, এবিএমছু, বাসুগাঁও ব্যৱসায়ী সন্থা আৰু বাসুগাঁও দোকানী সন্থাৰ যৌথ সিদ্ধান্ত মৰ্মে অহা শুকুৰবাৰৰ পৰা দেওবাৰলৈ তিনিদিনলৈ সম্পূৰ্ণ বাসুগাঁও চহৰত লক ডাউন ঘোষণা কৰিছে । এই সন্দৰ্ভত সদৌ বি টি আৰ বাঙালী যুৱ ছাত্ৰ ফেডাৰেচনৰ চিৰাং জিলা সমিতিৰ সভাপতি শুভ মজুমদাৰে ৰাইজৰ ভৱিষ্যত স্বাৰ্থৰ বাবে উমৈহতীভাৱে লক ডাউনৰ কাৰ্যসূচী লোৱাৰ কথা সদৰি কৰাৰ লগতে এই ক্ষেত্ৰত জিলা প্ৰশাসনক সহায় কৰিবলৈ আহ্বান জনায় ৷