চিৰাং, 16 জুলাই :বঙাইগাঁও বিধানসভা সমষ্টিৰ অন্তৰ্গত চিৰাং জিলাৰ ওদালগুৰিত বঙাইগাঁও জিলা কংগ্ৰেছ কমিটিৰ সভাপতি শংকৰ প্ৰসাদ ৰায়ৰ নেতৃত্বত বন্যাৰ্তক সাহাৰ্য বিতৰণ কৰা হয় ৷ বুধবাৰে বঙাইগাঁও বিধানসভা সমষ্টি যুৱ কংগ্ৰেছৰ দলে আই নদীৰ বানপানীৰ কৱলত পৰি আশ্ৰয় শিৱিৰত আশ্ৰয় লৈ থকা ওদালগুৰি, ছোটো আমগুৰিত থকা ৩টা শিৱিৰ পৰিদৰ্শন কৰে ।
বঙাইগাঁও সমষ্টি যুৱ কংগ্ৰেছ কমিটীৰ পৰা আশ্ৰয় শিৱিৰত থকা লোকসকলক কিছু পৰিমাণে সাহাৰ্য সামগ্ৰী আগবঢ়ায় । জানিব পৰা মতে, এই শিৱিৰ কেইটাত 300ৰো অধিক সংখ্যক লোকে আশ্ৰয় লৈ আছে । দুখৰ বিষয় অসম চৰকাৰে এই লোকক আশ্ৰয় শিৱিৰত পানী, পোহৰ যোগান ধৰা নাই ।
পশুধনো বহুত আছে এইকেইটা আশ্ৰয় শিৱিৰত ৷ চৰকাৰীভাবে মাত্ৰ 800 গ্ৰাম কৈ খাদ্য দি আহিছে যিটো পৰ্যাপ্ত নহয়, শিশুসকলৰ বাবেও শিশু খাদ্য যোগান দিয়া নাই । চিৰাং জিলাৰ এইসমুহ বানাক্ৰান্ত অঞ্চল বঙাইগাঁও বিধান সভা সমষ্টিৰ অন্তৰ্গত যদিও সমষ্টিটোৰ বিধায়ক তথা মন্ত্ৰী ফণীভূষণ চৌধুৰী আজিলৈ এইসকল লোকৰ সাহাৰ্যৰ কথা বাদেই কোনো খবৰেই নল'লে বুলি অভিযোগ উত্থাপন হৈছে ।