বিজেপিৰ বিৰুদ্ধে সৰব বঙালী যুৱ ছাত্ৰ ফেডাৰেচন

হিমন্তৰ মন্তব্যৰ প্ৰতিক্ৰিয়া বঙালী যুৱ ছাত্ৰ ফেডাৰেচনৰ । চিৰাঙৰ বিজনীত বিটিআৰ বঙালী যুৱ ছাত্ৰ ফেডাৰেচনৰ সংবাদ মেল। বিজেপিয়ে সদায় বঙালী বিদ্বেষী কাম কৰি আছে । মাথো নিৰ্বাচন আহিলেহে বিজেপিৰ বঙালীৰ কথা মনত পৰে বুলি তীব্ৰ সমালোচনা কৰে ৰাহুল ঘোষে ।

চিৰাং, 18 নৱেম্বৰ : মন্ত্ৰী হিমন্ত বিশ্বই বিটিচিত নিৰ্বাচনী প্ৰচাৰৰ নামত বিভিন্ন দল সংগঠনক কটাক্ষ কৰাত প্ৰতিক্ৰিয়া ব্যক্ত কৰিছে বঙালী সংগঠনে । সদৌ বিটিআৰ বঙালী যুৱ ছাত্ৰ ফেডাৰেচনৰ চিৰাং জিলা সমিতিৰ সাধাৰণ সম্পাদকে এক সংবাদ মেলত এই প্ৰতিক্ৰিয়া প্ৰকাশ কৰে । সাধাৰণ সম্পাদক ৰাহুল ঘোষে সংবাদ মেলত কয় যে, যোৱা কেইদিনৰ পৰা বিটিচি নিৰ্বাচনৰ প্ৰচাৰৰ নামত বঙালী যুৱ ছাত্ৰ ফেডাৰেচনক উদ্দেশ্য কৰি মন্তব্য কৰি আছে । বঙালী সকলে বিজেপিক কিয় ভোট দিব বুলি প্ৰশ্ন কৰি কয় যে, এই বিষয়টো বঙালী সকলৰ কাৰণে অতি চিন্তনীয় বিষয় ।

তেওঁ কয় যে, বিজেপিয়ে সদায় বঙালী বিদ্বেষী কাম কৰি আছে । বিজেপিৰ হিন্দুত্ববাদী বিধায়ক শিলাদিত্য দেৱৰ সমষ্টিত বহু লোকৰ নাম কৰ্তন কৰা হৈছে এনআৰচিৰ পৰা । ইয়াৰোপৰি বিজেপিৰ ৰাজ্যিক সভাপতি ৰণজিৎ দাসৰ সমষ্টিতো বহু বঙালি হিন্দুৰ নাম কৰ্তন হৈছে । এনে উদাহৰণ বহুত আছে । প্ৰধান মন্ত্ৰীয়ে বৰাকত নিৰ্বাচনী প্ৰচাৰলৈ আহি ডিটেনচন কেম্প ভঙাৰ কথা কৈছিল । কিন্তু এতিয়াও বাহাল আছে ডিটেনচন কেম্প । নতুনকৈ আৰু ডিটেনচন কেম্প বনাইয় আছে । এই মিছলীয়া চৰকাৰে নিৰ্বাচনী বতৰ আহিলেই বঙালী হিন্দুৰ ভোট লোৱাৰ বাবে ডাঙৰ ডাঙৰ প্ৰতিশ্ৰুতি দি যায় বুলি মন্তব্য কৰে ৰাহুল ঘোষে ।

গোৱালপাৰাত মোদীৰ ঘোষণাৰ পিচতে বঙালী সকলক উপহাৰ হিচাবে স্থায়ী ডিটেনচন কেম্প বনাই আছে আৰু বঙালী সকলক হত্যাৰ ষড়যন্ত্ৰ কৰিছে বুলি মন্তব্য কৰে সাধাৰণ সম্পাদকজনে । বহু লোক জীৱিত অৱস্থাত বিদেশী হৈ ডিটেনচন কেম্পত থাকে আৰু মৃত্যুৰ পিচত স্বদেশী হয় । এনে অৱস্থাত মুখ্যমন্ত্ৰী সহ সকলো লোকেই বহু কথাই কৈছিল যি সমূহ এতিয়া মিছাত পৰিণত হৈছে । মাথো নিৰ্বাচন আহিলেহে বিজেপিৰ বঙালীৰ কথা মনত পৰে বুলি তীব্ৰ সমালোচনা কৰে ৰাহুল ঘোষে ।

অসম চুক্তিৰ ৬ নং দফা ৰূপায়ণ কৰিলে বঙালী সকল দ্বিতীয় শ্ৰেণীৰ নাগৰিক হ’ব বুলি উল্লেখ কৰি তেওঁ কয় যে, আমি এই সকলোবোৰ বুজি পাইয়ো কিয় বিজেপিত যাম । ১৯৫১ চনৰ নাগৰিক পঞ্জী নথকা কোনো বঙালী নাই বিটিচিত । গতিকে ডি ভোটাৰৰ নামত হাৰাশাস্তি বন্ধ কৰাৰ আহ্বান জনায় সম্পাদক গৰাকীয়ে । অন্যথা তীব্ৰ আন্দোলন কৰি যোৱাৰো হুংকাৰ দিয়ে তেওঁ ।

লগতে পঢ়ক :ডিমা হাছাওৰ মাহুৰত মাটিৰ তলৰ পৰা নিৰ্গত হৈছে জুই