চিৰাঙ,3 নৱেম্বৰঃসোপাধৰা সন্দেহত চিৰাঙত এগৰাকী বয়োজ্যেষ্ঠ ধৰ্মগুৰুক একাংশ উন্মাদ লোকে অমানৱীয়ভাৱে প্ৰহাৰ কৰাৰ এক চাঞ্চল্যকৰ ঘটনা পোহৰলৈ আহিছে । শনিবাৰে চিৰাং জিলাৰ ভাৰত-ভূটান সীমান্তৰ দাদগিৰিত এজন ৭০ বছৰীয়া ধৰ্মগুৰুক সোপাধৰাৰ সন্দেহত নিৰ্মমভাৱে প্ৰহাৰ কৰে একাংশ উন্মাদ লোকে ।
তথ্যনুসৰি কাজলগাওঁৰ পৰা যোৱাকালি ভাৰত-ভূটান সীমান্তৰ দাদগিৰিৰ এখন ধৰ্মীয় আশ্ৰম 'মানৱ উত্থান সেৱা সমিতি'লৈ আহিছিল মহাত্মা অক্ষৰানন্দ চন্দ্ৰ প্ৰসাদ উপাধ্যায় নামৰ বৰ্ষীয়ান ধৰ্মগুৰুগৰাকী । মহাত্মা অক্ষৰানন্দ চন্দ্ৰ প্ৰসাদ উপাধ্যায় নামৰ ব্যক্তিজন মানৱ ধৰ্মৰ এখন ধৰ্মীয় অনুষ্ঠানৰ সাধু তথা পণ্ডিত । ধৰ্মগুৰুগৰাকীয়ে সীমান্তৰ দাদগিৰিৰ এগৰাকী কন্যা শিশুৰ সৈতে নিজৰ মোবাইল ঠিক কৰিবলৈ তাইৰ পিতৃৰ সহিতে একেলগে বজাৰলৈ গৈছিল ।
বজাৰ কৰি থকাৰ মাজতেই ধৰ্ম গুৰু মহাত্মাই কন্য়া গৰাকীক মিঠাই খুৱাবলৈ হোটেল এখনলৈ লৈ যায় ৷ কিন্তু বজাৰত উপস্থিত একাংশ মানসিকভাৱে দুৰ্বল সন্দেহবাদী মানুহে ধৰ্মগুৰু মহাত্মাই কন্যা শিশুগৰাকীক চোৰ কৰি লৈ যোৱা বুলি চিঞৰ-বাখৰ কৰে ধৰ্মগুৰুক অতি নিৰ্মমভাৱে প্ৰহাৰ কৰিবলৈ আৰম্ভ কৰে । তাৰ্পয্যপূৰ্ণ কথাটো হ'ল যে, ধৰ্মগুৰুক উদ্ধাৰ কৰিবলৈ যোৱা আৰক্ষীৰ বাধাকো ভ্ৰক্ষেপ নকৰি উত্তেজিত লোকসকলে ধাৰাবাহিকভাৱে সন্তগৰাকীক আক্ৰমণ কৰে । কিছুসময়ৰ পিছত শান্তিপুৰ আৰক্ষী চকীৰ আৰক্ষীৰ এটা দলে ধৰ্মগুৰুগৰাকীক উদ্ধাৰ কৰি থানালৈ লৈ আনে আৰু চিকিৎসাৰ ব্যৱস্থা কৰে ।