50 হাজাৰ টকা চুৰ কৰি ৰঙাঘৰত সোমাল বীৰেন্দ্ৰ-ঋষি

গৃহস্থৰ ঘৰৰ পৰা 50 হাজাৰ টকা চুৰ কৰি বৰহাট আৰক্ষীৰ জালত পৰিল বীৰেন্দ্ৰ দাস আৰু ঋষি তাঁতী নামৰ দুই যুৱক (Borhat police arrested Two thieves) ৷ চৰাইদেউৰ বৰাছালি চাহ বাগিচাত সংঘটিত হৈছিল এই চুৰিকাণ্ড ৷

মৰাণ, 26 জুন : চৰাইদেউ জিলাৰ বৰহাট আৰক্ষী থানাৰ অন্তৰ্গত বৰাছালি চাহ বাগিচাত সংঘটিত হয় এক চুৰিকাণ্ড ৷ গৃহস্থৰ অনুপস্থিতিৰ সুযোগ গ্ৰহণ কৰি দুই চোৰে লুটি নিলে 50 হাজাৰ টকা ৷ অৱশ্যে ঘটনা সংঘটিত কৰি সাৰি নগ’ল চোৰ দুটা ৷ কম সময়ৰ ভিতৰতে বৰহাট আৰক্ষীয়ে আটক কৰিলে বীৰেন্দ্ৰ দাস আৰু ঋষি তাঁতী নামৰ দুই অভিযুক্তক (Borhat police arrested Two thieves) ৷

ঘটনাৰ বিৱৰণি অনুসৰি, বৰাছালি চাহ বাগিচাৰ নতুন লাইনৰ নিবাসী চিলন্তী খেৰুৱাই বৰহাট শাখা এচ বি আই বেংকৰ পৰা জীয়েকৰ বিয়াৰ বাবে 50 হাজাৰ টকা আনি ঘৰৰ আলমিৰাত থৈ দিছিল । এই খবৰ বিশেষ সূত্ৰে লাভ কৰিছিল সেই অঞ্চলৰে বীৰেন্দ্ৰ দাস আৰু ঋষি তাঁতী নামৰ দুই যুৱকে ৷ তাৰ পাচৰে পৰা সুযোগৰ সন্ধানত থকা দুই চোৰে ঘৰত কোনো নথকাৰ সুযোগ লৈ সমুদায় টকা লৈ উধাও হয় ৷

চুৰিকাণ্ড সংঘটিত হোৱাৰ পাচতে ভুক্তভোগী পৰিয়ালটো কাষ চাপে বৰহাট আৰক্ষীৰ ৷ গৃহস্থই দাখিল কৰা এজাহাৰৰ ভিত্তিত আৰক্ষীয়ে আৰম্ভ কৰে তদন্ত ৷ সেই তদন্তৰ আলমত আৰক্ষীয়ে বীৰেন্দ্ৰ দাস আৰু ঋষি তাঁতীৰ ঘৰৰ চিলিঙৰ ওপৰত লুকুৱাই থোৱা অৱস্থাত উদ্ধাৰ কৰে চুৰি হোৱা টকাখিনি ৷

টকাখিনি উদ্ধাৰ কৰাৰ লগতে বৰহাট আৰক্ষীয়ে গ্ৰেপ্তাৰ কৰে অভিযুক্ত বীৰেন্দ্ৰ দাস আৰু ঋষি তাঁতী নামৰ যুৱকদ্বয়ক (Two thieves arrested in Charaideo) ৷

লগতে পঢ়ক :নগাঁও চহৰত এতিয়া মুক্তভাৱেই সেৱন কৰিব পাৰে নিষিদ্ধ ড্ৰাগছ !