চৰাইদেউৰ বিজেপিৰ নেতাক আক্ৰমণত জড়িত তিনিজনক গ্ৰেপ্তাৰ

BJP Leader Attack Charaideo : চৰাইদেউৰ বিজেপি নেতা লক্ষ্মীনাথ তাছাক আক্ৰমণৰ ঘটনাই পাৰ কৰিলে এসপ্তাহ ৷ এতিয়াও আৰক্ষীয়ে কৰায়ত্ব কৰিবলৈ সক্ষম হোৱা নাই ঘটনাৰ খলনায়কক ৷

ডিব্ৰুগড়, 14 জানুৱাৰী: চৰাইদেউ জিলাত বিজেপি নেতাক আক্ৰমণৰ ঘটনাৰ চাঞ্চল্য এতিয়াও অব্যাহত আছে ৷ জিলাখনৰ বিজেপিৰ সভাপতি লক্ষ্মীনাথ তাছাক কাৰ্যালয় চৌহদত দুৰ্বৃত্তই আক্ৰমণ কৰা ঘটনাই জিলাখনত এতিয়াও উত্তেজনা অব্যাহত আছে ৷

উক্ত ঘটনাৰ কেবাটাও দিন পাৰ হোৱাৰ পাছতো আৰক্ষীয়ে সন্ধান উলিয়াব পৰা নাই ঘটনাৰ খলনায়ক সঞ্জয় শ্বাহৰ । ঘটনাৰ সন্দৰ্ভত সোণাৰি আৰক্ষীয়ে সোণাৰিৰ এছাৰ পেট্ৰ’ল ডিপোৰ কৰ্মচাৰী মহিন্দ্ৰ শ্বাহ, শচীন কুমাৰ আৰু চিকণ্ডৰ শ্বাহক দেওবাৰে গ্ৰেপ্তাৰ কৰি তিনিদিনৰ আৰক্ষীৰ জিম্মাত লৈ সোধাপোছা অব্যাহত ৰাখিছে ।

উল্লেখযোগ্য 6 জানুৱাৰীৰ নিশা সোণাৰি নগৰৰ মাজমজিয়াত অৱস্থিত চৰাইদেউ জিলাৰ ভাৰতীয় জনতা পাৰ্টিৰ মুখ্য কাৰ্যালয়ত জিলা সভাপতি লক্ষীনাথ তাছাক আক্ৰমণ কৰে উদণ্ড যুৱকৰ এটা দলে । নিশা কাৰ্যালয়ৰ চৌহদত উদণ্ড যুৱকৰ দলটোৱে অপ্ৰীতিকৰ পৰিস্থিতিৰ সৃষ্টি কৰাত বাধা দিবলৈ যাওঁতেই সভাপতিগৰাকীৰ লগতে তেওঁৰ সতীৰ্থক উদণ্ড যুৱকৰ দলটোৱে প্ৰহাৰ কৰাৰ অভিযোগ উত্থাপিত হৈছিল ।

দুৰ্বৃত্তৰ দলটোৱে লক্ষ্মীনাথ তাছাৰ মোবাইল ফোনটোও কাঢ়ি লোৱাৰ অভিযোগ উত্থাপিত হৈছিল ৷ সোণাৰিৰ কাষৰীয়া ৰজাবাৰীৰ সুৰা তথা গো-মাফিয়া সঞ্জয় শ্বাহৰ নেতৃত্বত সংঘটিত হৈছিল বিজেপি সভাপতি লক্ষ্মীনাথ তাছাক আক্ৰমণৰ ঘটনা ৷ এই তথ্য লাভ কৰিছে আৰক্ষীয়ে । ইতিমধ্যে সঞ্জয় শ্বাহৰ গাড়ীৰ চালকক আটক কৰিছে আৰক্ষীয়ে ।

গাড়ীৰ চালকজনে সকলো কথা সংবাদ মাধ্যমৰ আগত স্বীকাৰো কৰিছে । কিন্তু ঘটনাৰ কেবাটাও দিন পাৰ হোৱাৰ পাছতো আৰক্ষীয়ে মূল আক্ৰমণকাৰীক আটক কৰিব নোৱাৰাত ঘটনাক লৈ চৰাইদেউ জিলাত বিৰূপ প্ৰতিক্ৰিয়া অব্যাহত আছে ।

লগতে পঢ়ক:ৰাজ্যত চৰ্চিত দুটা ঘটনাই উদঙাই দিলে চৰাইদেউ জিলা আৰক্ষী প্ৰশাসনৰ দুৰ্বলতা