উন্নয়নে ঢুকি পোৱা নাই মাহমৰা বৰবিল প্ৰাথমিক স্বাস্থ্যকেন্দ্ৰক

পঁয়া লাগিছে মাহমৰা বৰবিল প্ৰাথমিক স্বাস্থ্যকেন্দ্ৰত (Poor condition of Primary Health center of Mahmora)৷ প্ৰয়োজনৰ সময়ত পোৱা নাযায় সাধাৰণ ঔষধ এটাও ৷ এই অভিযোগ অঞ্চলটোৰ ৰাইজৰ ৷

মৰাণ, ৫ জুলাই : এফালে ৰাজ্যত বিজেপি চৰকাৰৰ উন্নয়নৰ জয়গান আৰু আনফালে ৰাজ্যত দৃশ্যিত ইয়াৰ বিপৰীত ছবি ৷ উন্নয়নৰ শ্ল'গান দি থকা চৰকাৰৰ দিনত চৰাইদেউ জিলাৰ ১০৫ নং মাহমৰা বিধানসভা সমষ্টিৰ অন্তৰ্গত এটা প্ৰাথমিক স্বাস্থ্য কেন্দ্ৰৰ পুতৌলগা অৱস্থাই চকু কপালত তুলিছে সৰ্বসাধাৰণ ৰাইজৰ ৷

আন্তঃগাথঁনিৰ উন্নয়নৰ অভাৱত এতিয়া জৰাজীৰ্ণ ৰূপ লৈছে মাহমৰাৰ বৰবিল প্ৰাথমিক স্বাস্থ্যকেন্দ্ৰটোৱে । যাক ক্ষোভিত হৈ পৰিছে অঞ্চলটোৰ ৰাইজ ৷ উল্লেখ্য যে, বিগত ২০০৬ চনতেই বিধায়ক শৰৎ শইকীয়াই উদ্বোধন কৰিছিল উপ স্বাস্থ্যকেন্দ্ৰটো ৷ পৰৱৰ্তী সময়ত ২০১৮ চনত সাংসদ কামাখ্যা প্ৰসাদ তাছাৰ উপস্থিতিত মন্ত্ৰী যোগেন মহনে উদ্বোধন কৰিছিল বৰবিল প্ৰাথমিক স্বাস্থ্যকেন্দ্ৰ হিচাপে (Borbil Primary Health Centre)।

কিন্তু বৰ্তমান এই প্ৰাথমিক স্বাস্থ্য কেন্দ্ৰৰ অৱস্থা তথৈবচ । মাত্ৰ এগৰাকী চিকিৎসক তথা দুগৰাকী জিএনএমৰ দ্বাৰাই পৰিচালিত হৈ আহিছে স্বাস্থ্যকেন্দ্ৰটো । যাৰ ফলত স্বাস্থ্য কেন্দ্ৰটোত থকা একমাত্ৰ চিকিৎসকগৰাকী যদি কোনো জৰুৰী কামত বাহিৰলৈ যাবলগীয়া হয়, তেতিয়া অঞ্চলটোৰ ৰোগী প্ৰাথমিক চিকিৎসাৰ পৰাও বঞ্চিত হয় ।

ইফালে প্ৰয়োজনীয় ঔষধ আদিৰ অভাৱ হোৱা বাবেও ৰোগীক সাধাৰণ চিকিৎসাখিনি প্ৰদান কৰিবলৈ অপাৰগ কৰ্মৰত চিকিৎসক তথা নাৰ্ছসকল । যাৰ পৰিপ্ৰেক্ষিতত অতিশীঘ্ৰে বৰবিল প্ৰাথমিক স্বাস্থ্যকেন্দ্ৰৰ আন্তঃগাথঁনি উন্নয়ন তথা চিকিৎসক নিযুক্তি আৰু ঔষধ যোগানৰ দাবী উত্থাপন কৰিছে মাহমৰা আঞ্চলিক ছাত্ৰ সন্থাই ।

লগতে পঢ়ক :মিছমাৰীত বেলশিৰি নৈত বান্ধ দি খহনীয়া প্ৰতিৰোধত নামিল ৰাইজ