ফাঁচী বজাৰত ভোট বিচাৰি দোকানে দোকানে ৰঞ্জিত দাস

মঙলবাৰে গুৱাহাটী সমষ্টিৰ অগপ-বিজেপি মিত্ৰজোঁটৰ প্ৰাৰ্থীৰ হৈ প্ৰচাৰ চলাবলৈ ফাঁচী বজাৰত উপস্থিত হ'ল বিজেপিৰ ৰাজ্যিক সভাপতি ৰঞ্জিত দাস ৷ ফাঁচী বজাৰত দোকানে দোকানে গৈ কুইন ওঝাৰ বাবে ভোট ভিক্ষা কৰি প্ৰচাৰ অভিযান চলালে ৰঞ্জিত দাসে ।

গুৱাহাটী,9এপ্ৰিলঃ লোকসভা নিৰ্বাচনৰ বাবে প্ৰতিটো ৰাজনৈতিক দলৰ নেতা-পালিনেতা ব্যস্ত প্ৰচাৰ অভিযানত । ভোটাৰক আকৰ্ষণ কৰিবলৈ নিতৌ নতুন নতুন পন্থা অৱলম্বন কৰিছে ৰাজনৈতিক দল সমূহৰ নেতাসকলে । মঙলবাৰে সাধাৰণ ৰাইজৰ ওচৰত হাতযোৰ কৰি ভোট ভিক্ষা বিচাৰিলে বিজেপিৰ ৰাজ্যিক সভাপতি ৰঞ্জিত দাসে। ফাঁচী বজাৰৰ ব্যৱসায়িক প্ৰতিষ্ঠান সমূহলৈ গৈ ব্যৱসায়িক প্ৰতিষ্ঠান সমূহৰ গৰাকী আৰু গ্ৰাহকক হাতযোৰ কৰি ৰঞ্জিত দাসে গুৱাহাটী লোকসভা সমষ্টিৰ বিজেপিৰ প্ৰাৰ্থী কুইন ওজাক ভোটদান কৰাৰ আহ্বান জনায় ৷

ইপিনে ৰাজ্যিক সভাপতিগৰাকীৰ এই প্ৰচাৰ অভিযানত তেওঁক সংগ দিয়ে মংগলদৈ লোকসভা সমষ্টিৰ বৰ্তমানৰ সাংসদ ৰমেন ডেকাই ৷ উল্লেখ্য যে কিছুদিন পূৰ্বে ৰঞ্জিত দাসে গণেশগুৰি বজাৰত গৈ এইদৰে কুইন ওজাৰ বাবে ব্যৱসায়ী সকলৰ ওচৰত ভোট ভিক্ষা কৰিছিল ৷