গুৱাহাটী,৬ মাৰ্চ: ৰাজ্য চৰকাৰৰ স্ব-অগ্ৰাধিকাৰ পুঁজিৰ ২০১৮-১৯ প্ৰকল্পৰ অধীনত মহানগৰীত নিৰ্মাণ কৰা হ'ব নতুন উৰণীয়া সেঁতু । বুধবাৰে ৰাধা গোবিন্দ বৰুৱা পথৰ পৰা গণেশগুৰিৰ বিষ্ণু ৰাম মেধি সেঁতুলৈ নিৰ্মাণ হ'বলগীয়া নতুন উৰণীয়া সেঁতুৰ আধাৰশিলা স্থাপন কৰিলে মুখ্যমন্ত্ৰী সৰ্বানন্দ সোণোৱালে ।
মহানগৰীত নতুন উৰণীয়া সেঁতুৰ আধাৰশিলা স্থাপন গণেশগুৰিৰ বিষ্ণু ৰাম মেধি সেঁতুৰ তলত অনুষ্ঠিত মাঙ্গলিক শুভাৰম্ভ অনুষ্ঠানত মুখ্যমন্ত্ৰী সৰ্বানন্দ সোণোৱালৰ লগতে বিত্তমন্ত্ৰী ডঃ হিমন্ত বিশ্ব শৰ্মা, গুৱাহাটীৰ সাংসদ বিজয়া চক্ৰৱৰ্তী আৰু দিছপুৰ সমষ্টিৰC বিধায়ক অতুল বৰাই অংশগ্ৰহণ কৰে । গুৱাহাটী মহানগৰীক উত্তৰ-পূব এছিয়াৰ কৰিড'ৰ হিচাপে নিৰ্মাণ কৰাৰ উদ্দেশ্যে বৰ্তমানৰ চৰকাৰখনে গুৱাহাটীৰ উন্নয়নৰ ক্ষেত্ৰত গুৰুত্ব প্ৰদান কৰা বুলি মন্তব্য প্ৰকাশ কৰে মুখ্যমন্ত্ৰী সৰ্বানন্দ সোণোৱালে ।
ইপিনে মহানগৰীত দিনক দিনে বৃদ্ধি পাই অহা যান-জঁটৰ সংখ্যা হ্ৰাস কৰিবলৈ চৰকাৰে কেইবাখনো উৰণীয়া সেঁতু নিৰ্মাণৰ সিদ্ধান্ত গ্ৰহণ কৰিছে বুলি মন্তব্য কৰে বিত্তমন্ত্ৰী ডঃ হিমন্ত বিশ্ব শৰ্মাই । উল্লেখ্য যে ৫৮.৭৪ কোটি টকা ব্যয় সাপেক্ষে নিৰ্মাণ হ'বলগীয়া মুঠ ৩১৫.১৩৮ মিঃ দৈঘ্যৰ নতুন উৰণীয়া সেঁতুৰ কাম ১৮ মাহৰ ভিতৰত সম্পন্ন কৰা হ'ব আশা প্ৰকাশ কৰে বিত্তমন্ত্ৰীগৰাকীয়ে ।
