শৰাইঘাট, ১১ মাৰ্চঃ শৰাইঘাটৰ তলৰ এখন জীৱন যুদ্ধ ৷ এই যুদ্ধত মোগলৰ ঢাল-তৰোৱালৰ বিৰুদ্ধে নহয়, কঠিন জীৱনৰ জীয়া বাস্তৱৰ বিৰুদ্ধে চলি থকা এইখন আন এক শৰাইঘাটৰ ৰণ ৷
শৰাইঘাট দলঙৰ তলত আপুনি দেখাৰ দৰে এয়া কোনো দুঃসাহসিক ক্ৰীড়াৰ দৃশ্য নহয়; এয়া হৈছে জীৱন যুদ্ধৰ এখন প্ৰত্যাশিত ছবি ৷ মহাবাহুৰ ওপৰত থকা শৰাইঘাট দলঙৰ তলত চলি থকা জীৱন যুদ্ধৰ দ্বিতীয় অথচ নেদেখা ছবি ৷
অন্ধবিশ্বাস আৰু ভক্তিৰ ওপৰত চলি থকা এইখন জীৱন যুদ্ধৰ কাহিনীত আছে কেইটিমান কণ কণ শিশু ৷ আপোনাৰ মোৰ দৰেই সাধাৰণ যাত্ৰীসকলৰ ভক্তিৰ ভাৰ এইদৰে সাধাৰণ থাৰ্মকলৰ ওপৰেদি গৈ কঢ়িয়াই আনে এইসকল কণ কণ শিশুৱে ৷
শৰাইঘাটৰ ওপৰেদি পাৰ হৈ যোৱা যাত্ৰীসকলে ব্ৰহ্মপুত্ৰ নদীলৈ পেলাই দিয়া কেইটিমান খুচুৰা পইচাতে আৱদ্ধ হৈ থাকে এইসকল শিশুৰ জীৱনৰ মায়া ৷ পখিলা খেদাৰ সময়ত কোনো শিক্ষাকে ধৰি তেনে কোনো চৰকাৰী আঁচনিয়ে ঢুকি নাপায় এঁওলোকক ৷ সাধাৰণ থাৰ্মকলৰ ওপৰত নিৰ্ভৰ কৰিয়ে কেইটুকুৰামান চুম্বক লৈ ব্ৰহ্মপুত্ৰৰ বুকুত এইদৰে চলে এইসকল শিশুৰ জীৱনৰ অন্বেষণ ৷ এঁওলোকৰ বহুতেই বিদ্যালয়লৈ যায় যদিও কোনোবাখিনিত ৰৈ গৈছে সিঁহতৰ জীৱন ৷ চৰকাৰৰ বিয়াগোম আঁচনিয়ে ঢুকি নোপোৱাকৈ এইদৰে শৰাইঘাটৰ তলত চলি থাকে এইসকল শিশুৰ আন এক জীৱন যুদ্ধ ৷